विराटनगर । आसन्न प्रतिनिधिसभा र प्रदेशसभा सदस्य निर्वाचनअन्तर्गत मोरङमा मनोनयनपत्र दर्ता गराउने क्रम सुरु भएको छ । यसका लागि काठमाडौंमा रहेका केन्द्रीय नेताहरू विराटनगर आउँदै छन् ।

कांग्रेस नेत्री सुजाता कोइराला मनोनयनपत्र दर्ता गराउन विराटनगर आइपुगेकी छन् । विराटनगर विमानस्थलमा उनले पार्टीको निर्णयानुसार आफू प्रतिनिधिसभा सदस्यको उमेदवार बन्न लागेको बताइन् ।

उनी मोरङ निर्वाचन क्षेत्र नम्बर–२ बाट उमेदवार बन्न लागेकी हुन् । त्यो क्षेत्रबाट ०७४ को निर्वाचनमा कांग्रेसका डा. मीनेन्द्र रिजाल विजयी भएका थिए ।

यस्तै, कांग्रेस नेता डा. शेखर कोइराला दिउँसो २ बजे विराटनगर आई मोरङ–६ बाट मनोनयनपत्र दर्ता गराउने उनका स्वकीयसचिव दिनेश थपलियाले जानकारी दिए ।

सञ्चार तथा सूचना प्रविधमन्त्री ज्ञानेन्द्रबहादुर कार्की भने विराटनगर विमानस्थल ओर्लिएर सुनसरीतर्फ लागेका छन् ।

कांग्रेस नेताहरू गुरुराज घिमिरे, भीम पराजुली, राजीव कोइराला र प्रदेश नम्बर–१ का आन्तरिक मामिला तथा कानुनमन्त्री केदार कार्की पनि काठमाडौंबाट विराटनगर आइपुगेका छन् ।