काठमाडौं । अनेसास कविता महोत्सव २०२२ मा आबुधाबी, यूएईका कवि अजित उत्सवको कविता ‘नानीबाबुलाई शिक्षा’ले प्रथम पुरस्कार प्राप्त गरेको छ । 

राष्ट्रकविको १०३ औँ जन्मजयन्तीको अवसर पारेर शनिबार आयोजित कार्यक्रममा ३१८ कविलालाई पछि पार्दै उनले नगद ५०० अमेरिकी डलरसहितको पुरस्कार प्राप्त गरेका हुन् ।

यसैगरी, काठमाडौंका राधिका कल्पितको ‘सन्तानका लागि सङ्कल्प’ कविताले नगद ३०० अमेरिकी डलरसहितको द्वितीय पुरस्कार प्राप्त गरेको छ । 

रामेछापका कवि विक्रमपवन परियार, अमेरिकाका कवि कोमलप्रसाद भट्ट र दुराडाँडा ,लमजुङका कवि प्रज्वल अधिकारीका कविताले २०० अमेरिकी डलर राशिको तृतीय पुरस्कार प्राप्त गरेका छन् ।

वरिष्ठ कवि तुलसी दिवसको प्रमुख आतिथ्यमा आयोजित कार्यक्रममा ६७ जना प्रतियोगी कविले अन्तिम प्रतिस्पर्धाका लागि जुमका माध्यमबाट कविता वाचन गरेका थिए ।

अनेसासका सल्लाहकार गोविन्द गिरी प्रेरणा, साहित्यकार प्रभा भट्टराई र कवि भीष्म उप्रेतीको निर्णायक मण्डलले गरेर पाँच कवितालाई पुरस्कृत गरेको हो ।