काठमाडौं । कैलालीमा मृतावस्थामा भेटिएकी १५ वर्षीया किशोरी आस्था शर्माको गोजीमा कविताको अंश फेला परेको छ । गएको सोमबार ‘स्कुल जान्छु’ भन्दै घरबाट निस्किएकी १५ वर्षीया आस्था आज मृतावस्थामा फेला परेकी हुन् ।

धनगढी उपमहानगरपालिका–१३, मोहनपुरकी आस्था गएको सोमबारदेखि बेपत्ता भएकी थिइन् । 

कैलाली भएर बग्ने मोहना नदी किनारमा शुक्रबार उनको शव फेला परेको हो । उनको गोजीमा भिजेको अवस्थामा कागजको टुक्रा भेटिएको र त्यसमा कविताको लाइन रहेको जिल्ला प्रहरी कार्यालय कैलालीका डीएसपी बेदप्रकाश जोशीले बताए ।

धनगढी–२, मोहना किनारमा उनको शव फेला परेको हो । डीएसपी जोशीले भने, “शव गल्ने अवस्थामा भेटिएको हो । उनको पाइन्टको गोजीमा एक कागज फेला पर्यो । त्यसमा नारीको सम्मान गरौं, स्वतन्त्रता दिऔँ भनेर कविता लेखिएको छ । सबै अक्षर भने चिन्न सकिने अवस्थामा छैनन् ।”

कविताको अन्त्यमा उनले कवयत्री भन्दै आफ्नो नाम लेखेकी छन् ।

आस्था सोमबार बिहान ‘स्कुल जान्छु’ भन्दै विद्यालयको पोसाकमा घरबाट निस्किएकी थिइन् । उनी बोराडाडीस्थित त्रिभुवन माविको कक्षा–८ मा अध्ययनरत थिइन् ।

आस्था आफ्नो साथीसँग आइतबार साँझ एक शिक्षकलाई भेट्न उनको घर पुगेको खुलेको छ । विद्यालयबाट सरुवा भएका शिक्षकलाई भेट्न गए पनि उनी घरमा नभेटिएको खुलेको प्रहरी अधिकारीहरू बताउँछन् ।

सोमबार उनी अरू दिनभन्दा छिटो घरबाट निस्किएको प्रहरी अनुुसन्धानबाट खुलेको छ ।

उनले घरमा आफ्नी बहिनीलाई ‘आफूले मन पराएको केटाले नभेटे आफू बेपत्ता हुन्छु’ भनेको सूचना प्रहरीले पाएको थियो । घटना सम्बन्धमा प्रहरीले उनका साथीसहित शंकास्पद व्यक्तिहरूसँग सोधपुछ गरिरहेको छ ।

प्रहरीले उनले मन पराएको भनेका युवकसँग पनि सोधपुछ गरेको थियो । शवको पोष्टमार्टम पछि अनुसन्धानबाट केही खुल्न सक्ने डीएसपी जोशी बताउँछन् । प्रारम्भीक रुपमा उनले हाम फालेर आत्महत्या गरेको प्रहरी आशंका छ ।