काठमाडौं । नेपाली कांग्रेसको १५औँ महाधिवेशनको मिति तय नहुँदै नेताहरूले त्यसलक्षित तयारी थालेका छन् । संस्थापनइतरका नेता डा. शेखर कोइरालाले सभापति शेरबहादुर देउवाको गृहप्रदेश सुदूरपश्चिमबाट महाधिवेशनको अभियान सुरु गर्न लागेका हुन् ।

त्यसका निम्ति डा. कोइराला शुक्रबार (भोलि) सुदूरपश्चिम प्रदेशको मुकाम रहेको धनगढी जान लागेका उनको निजी सचिवालयले जनाएको छ । सचिवालयका अनुसार, धनगढीमा नौ जिल्लाका कार्यकर्तासँग भेटघाट र पार्टीका विभिन्न कार्यक्रममा उनले सम्बोधन गर्ने तालिका छ । शुक्रबार नौवटै जिल्लाका कार्यकर्तासँग छुट्टाछुट्टै भेट गरी उनले अभियानलाई जिल्ला तहमै सुरु गर्न आह्वान गर्नेछन् ।

शनिबार कोइरालाले भ्रातृ तथा शुभेच्छुक संस्थाका प्रतिनिधिसँग भेटघाट गर्नेछन् । शनिबार दिउँसो उनले प्रजातान्त्रिक सेनानी संघको प्रथम प्रदेश अधिवेशनको उद्घाटन र सम्बोधन गर्नेछन् । उनले त्यहाँ स्थानीय तहका जनप्रतिनिधिसँग पछि अन्तक्रिया गर्ने तयारी गरेका छन् ।

डा. कोइरालासँग कांग्रेसका केही नेता मात्र सहभागी हुनेछन् । हृदयराम थानी, डा. गोविन्दराज पोखरेलसहितका नेताहरू त्यहाँ जान लागेका छन् ।

शनिबार कोइराला नौवटै जिल्लाका स्थानीय तहका प्रतिनिधि र जिल्ला, क्षेत्र र स्थानीय तहका सभापति तथा पदाधिकारीसँग अन्तरक्रियापछि काठमाडौं फर्कने सचिवालयले जनाएको छ ।