![चाडपर्व नजिकिएसँगै तरकारी र दैनिक खाद्य वस्तुको मूल्य अकासियो](https://12khari.top/uploads/posts/Tarkari and Vege1661858536.jpg)
काठमाडौं । चाडपर्व नजिकिएसँगै दाल, चामल तथा अन्य खाद्य वस्तुको मूल्य पनि बढेको छ । पछिल्लो एक महिनामा दैनिक रूपमा बढी उपभोग गरिने कतिपय खाद्य वस्तु तथा तरकारीको मूल्य अचाक्ली बढेको छ ।
साउन महिनाको र भदौ महिनाको खाद्य वस्तुको मूल्य तुलना गर्दा मासको दाल, स्टिम जिरा मसिनो चामल, सेतो केराउ, आँटा, गहुँ मैदाको मूल्य बढेको छ । यी खाद्य वस्तुको मूल्य पाँच रुपैयाँदेखि २५ रुपैयाँसम्म बढेको छ ।
नेपाल खुद्रा व्यापार संघका अनुसार एक महिनाको अन्तरालमा मासको दालको मूल्य २५ रुपैयाँ बढेको छ । गत साउन महिनामा प्रतिकिलो १६० रुपैयाँमा बिक्री गरिएको दाल भदौमा प्रतिकेजी १८५ रुपैयाँमा बिक्री भइरहेको छ ।
नेपाल चामल, तेल, दाल उत्पादक संघका अध्यक्ष सुबोधकुमार गुप्ताले अहिले भारतबाट नेपालमा आउने खाद्यन्नका वस्तु कमी भएकाले पनि केही मात्रामा मूल्य बढेको बताए । भारतले नेपाललगायत अन्य देशमा सामान निर्यात गर्ने हुँदा नेपालमा भन्दा अन्य मुलुकमा बढी बठाएको पनि मूल्यमा तलमाथि भएको उनको भनाइ छ ।
“मूल्य घट्बढ् सामान्य प्रक्रिया हो । तर, खाद्य वस्तुको मूल्य पाँच सात रुपैयाँ घट्बढ् हुने खासै ठुलो विषय हैन,” उनले भने, “भारतबाट सहज रूपमा सामान ल्याउन सकियो भने खाद्य वस्तुको मूल्य घट्न सक्छ ।”
![Global Ime bank](https://baahrakhari.com/uploads/bigyaapan/30885600.gif)
तर, खाद्य तेलको मूल्य भने साउनको तुलनामा घटेको छ । रुस र युक्रेनको लगातारको द्वन्द्वले विश्व भरी नै तेलको मूल्य बढेको थियो । तर पछिल्लो समय तेलको मूल्य पाँद रुपैयाँदेखि २० रुपैयाँसम्म घटेको व्यापार संघले जनाएको छ ।
अन्तर्राष्ट्रिय बजारबाट नै खाद्य तेलको मूल्य घट्बढ हुने भएकाले अहिले घटेर आएको गुप्ताले बताए ।
तरकारीको मूल्य १५० रुपैयाँसम्म बढ्यो
पछिल्लो समय हरियो धनियाँको मूल्य बढी रहेको छ । एक समय प्रतिकेजी ६०० रुपैयाँभन्दा बढी पुगेको धनियाँको मूल्य भदौ १४ गते (आज) ३२५ रुपैयाँ कायम भएको छ । एक महिना अगाडि साउन १६ गते प्रतिकेजी १७५ रुपैयाँमा खरिद–बिक्री भएको धनियाँ प्रतिकेजी १५० रुपैयाँ बढेर कारोबार भएको छ ।
त्यस्तै, चाइनिज सुकेको लसुन, कन्या च्याउ, अदुवा, गोलभेडा तथा पाकेको फर्सीको मूल्य प्रतिकेजी १० रुपैयाँदेखि ७० रुपैयाँसम्म बढेको छ ।
मौसम अनुसारको अनुसारको तरकारी उपत्यका बाहिरबाट नआउँदा तरकारीको मूल्य बढ्को कालीमाटी बजार विकास समितिले जानकारी दिएको छ । समितिका उपनिर्देशक तथा प्रवक्ता विनय श्रेष्ठले वर्षाका कारण उपत्यका बाहिरबाट आउने तमातर तथा केही त्यस्ता मसलेदार तरकारीको मूल्यबाहेक अरू खासै नबढेको जानकारी दिए ।
अरू वर्षको तिजमा जस्तो यो वर्षको तिजमा तरकारीको मूल्य त्यति धेरै नबढेको उनको भनाइ छ । तर, बेमौसमी तरकारीको मूल्यमा भने केही मात्रामा मूल्य बढ्ने स्वाभाविक भएको उनी बताउँछन् ।
“अहिले तरकारीको मूल्य त्यस्तो धेरै बढेको छैन । कुनै कुनै मसालेदार तरकारीको मूल्य बढ्नु स्वाभाविक हो,” उनले भने, “तर, यो वर्षको तरकारीको मूल्य अघिल्ला वर्षहरूको जस्तो बढेको छैन ।”
मसलेदार तरकारीबाहेक अन्य तरकारीको मूल्य भने कुनै स्थिर छ भने कतिपयको मूल्य घटेको छ ।