काठमाडौं । एमएडब्लू बृद्धीले सोकोन ईसी थर्टीसिक्स यात्रुबाहक भ्यान नेपाल भित्र्याएको छ ।

मंगलबार काठमाडौंमा एक कार्यक्रमको आयोजना गर्दै कम्पनीले विद्युतीय भ्यान सोकोन ईसी ३६ सार्वजनिक गरेको हो ।

कार्यक्रममा अभिनेता राजेश हमाल र सोकोनका चिनियाँ अधिकारीहरू सहभागी थिए।

कार्यक्रमबाटै एमएडब्लु वृद्धी कमर्सियल भेहिकलका प्रमुख कार्यकारी अधिकृत तुषार गुप्ता र अभिनेता हमालले सोकोन ईसी थर्टी सिक्सका पहिलो ४१ जना ग्राहकलाई चाबी हस्तान्तरण गरेका थिए ।

सोकोन ईसी थर्टी थ्री भ्यानको मूल्य ४५ लाख ५० रुपैयाँ रहेको छ ।

के के छन् फिचर ?

एघार सिटे विद्युतीय भ्यानले ३०० किलोमिटरको रेन्ज प्रदान गर्ने कम्पनीले जनाएको छ ।

गाडीमा रहेको ४२ किलोवाट आवरको सीएटीएल ब्याट्रीमा १.३ घण्टामा २० देखि ८० प्रतिशत चार्ज हुने कम्पनीले जनाएको छ । करिब साढे दुई घण्टामा फुल चार्ज हुने बताइएको छ ।

यसमा ६० किलोवाटको इलेक्ट्रिक मोटरले २०० एनएम टर्क उत्पन्न गर्न सक्छ ।

गाडीको अधिकतम ग्रेडेबिलिटी ४० प्रतिशत छ । गाडीमा १८८ मिलिमिटरको ग्राउन्ड क्लियरेन्स छ।

यसबाहेक एबीएस, ईबीडी, रिभर्स राडार र क्यामेराजस्ता सुरक्षाका सुविधासेत सोकोन ईसी थर्टी सिक्स भ्यानमा छन् ।

सामान्यतया महँगो ईभीमा मात्र पाइने रिजेनेरेटिभ ब्रेकिङ प्रणालीको सुविधा यो भ्यानमा उपलब्ध गराइएको कम्पनीले जनाएको छ । भ्यानमा टच स्क्रिन मल्टिमिडिया इन्फोटेनमेन्ट सिस्टम पनि छ ।

एमएडब्लू ग्रुप अफ कम्पनीजका अध्यक्ष विष्णुकुमार अग्रवालले कम्पनीले गुणस्तरीय अटोमोबाइल मात्र नभई सर्भिस र स्पेयर पार्ट्सलाई पनि प्राथमिकता दिएको बताए ।

उनले भनेका छन्, “सोकोनसँग साझेदारी गरी नेपाली बजारमा ईसी थर्टीसिक्स लन्च गर्न पाउँदा हामी गर्व गर्छौं । हामीलाई विश्वास छ, यो सफल हुनेछ र ग्राहकहरूको आवश्यकतालाई यसले पूरा गर्नेछ ।”

कम्पनीका प्रबन्ध निर्देशक विवेक सिकरियाले उच्चस्तरीय सेवा, गुणस्तरीय स्पेयर पार्ट्स र ग्राहकको सन्तुष्टिलाई केन्द्रमा राख्ने बताएका छन् ।