नयाँ दिल्ली । एक मुस्लिम महिलामाथि सामूहिक बलात्कार गरेको अभियोगमा आजीवन कारावास सजाय सुनाइएका ११ जना अभियुक्तलाई रिहाइ गर्ने भारत सरकारको निर्णयविरुद्ध मुलुकभर विरोध प्रदर्शन आयोजना गरिएका छन् ।
सन् २००२ मा भएको हिन्दु र मुस्लिम समुदायबीचको साम्प्रदायिक दंगामा पीडित बिल्कीस बानोको परिवारका १४ जना सदस्य पनि मारिएका थिए । १५ वर्ष कारावास सजाय भुक्तान गरिसकेका ती अभियुक्तलाई रिहाइ गरिएको हो ।
विरोध प्रदर्शनमा संलग्न महिला तथा पुरुषले उनीहरूको रिहाइको निर्णय फिर्ता लिन सरकारलाई आह्वान गरेका छन् ।
एक प्रदर्शनकारी छात्राले महिलालाई यौन खेलौना ठान्ने र पितृसत्तात्मक सोचको कारण अहिले बलात्कार सामान्य घटनामा परिणत हुन थालेको गुनासो गरेकी छन् ।
यसैगरी एक सयजना भन्दा बढी अवकाश प्राप्त सरकारी कर्मचारीले बलात्कारीहरूलाई यसरी रिहा गरिँदा महिलाहरूको सुरक्षामा डरलाग्दो एवं नकारात्मक असर पर्ने भन्दै भारतका प्रधान न्यायाधीशलाई पत्र लेखेका छन् ।
भारतको ७५औँ स्वतन्त्रता दिवसको अवसरमा १५ अगष्टमा गुजरात सरकारले उनीहरूको बाँकी सजाय मिनाहा गर्दै रिहा गर्ने निर्णय गरेको हो ।
बीबीसीबाट ।