काठमाडौं । सत्तसाझेदार दल नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले देशलाई दुर्घटनाबाट जोगाउन गठबन्धन आवश्यक परेको बताएका छन् । शनिबार बुटवलमा सञ्चारकर्मीसँग कुरा गर्दै उनले यस्तो बताएका हुन् ।

उनले गएको स्थानीय तह निर्वाचनमा आपसी गठबन्धन र तालमेल भनेजस्तो नभए पनि गठबन्धन दल र सरकार मिलेर चुनाव गराउनु नै ठूलो कुरा भएको जिकिर गरे ।

प्रचण्डले स्थानीय तह निर्वाचनको परिणाम जस्तो आए पनि देशलाई दुर्घटनाबाट बचाउन सफल भएकाले उपलब्धिमूलक मानेको उल्लेख गरे ।

उनले माओवादी केन्द्र छाडेर गएका नेताहरू पुनः पार्टीमा फर्कंदा पार्टी थप बलियो भएको बताए ।