![Global Ime bank](https://baahrakhari.com/uploads/bigyaapan/30885600.gif)
बेइजिङ । अमेरिकी अधिकारीहरूले पुनः ताइवानको भ्रमण गरेपछि चीन रुष्ट भएको छ । ताइवान जलसंयोगी (स्टे«ट)मा बढ्दो तनावबीचमा स्वशासित टापुको नेतृत्वसँग वार्ता गर्न आइतबार इन्डियानाका गभर्नर एरिक होल्कोम्ब ताइवान पुगेका थिए । चीनले त्यस घटनाउपर आफ्नो आक्रोश व्यक्त गरेको एएनआईलाई उदृत गर्दै भारतीय समाचार संस्था द प्रिन्टले जनाएको छ ।
अमेरिकी प्रतिनिधिमण्डलको यो दोस्रो भ्रमण हो । यसअघि अमेरिकी सदनकी सभामुख न्यान्सी पेलोसीको भ्रमणपछि चीनलाई आक्रोशित बनाएको थियो । र, ताइवान जलसंयोगीमा सैन्य तनाव उत्पन्न भएको थियो ।
“ताइवान र दक्षिण कोरियामा आर्थिक विकास यात्रा सुरु गर्न म ताइपेईमा आएँ । इन्डियाना १० ताइवानी र १२ दक्षिण कोरियाली व्यवसायीहरूको घर हो । यो हप्ता गभर्नरको रूपमा मेरो दक्षिण कोरियाको दोस्रो यात्रा हो । र, म महामारी अघिदेखि नै ताइवान भ्रमण गर्ने पहिलो गभर्नर भएकोमा गर्व गर्छु,” होल्कोम्बले ट्विटमा लेखेका छन् ।
यता, चिनियाँ सरकारको मुखपत्र ग्लोबल टाइम्सले उक्त भ्रमणलाई अमेरिकी राजनीतिज्ञहरूको ‘विषाक्त प्रवृत्ति’ र ताइवानलाई ‘प्यादा’को रूपमा प्रयोग गरेको टिप्पणी गरेको छ ।
ग्लोबल टाइम्सका अनुसार चीनले ताइवान समस्या समाधान गर्न आफ्नै गतिमा काम गर्नेछ । कुनै पनि सम्भावित समयमा अपरेसनलाई सामान्यकरण गरी पूर्णता दिन ताइवान जलसंयोगीमा अपरेसनहरू सञ्चालन गर्न तयारी सुरु गर्नेछ । द प्रिन्ट