लन्डन । बेलायतको संसदीय चुनावमा निकै अगाडि देखिएको लेबर पार्टीका नेता किएर स्टार्मरले आफूलाई मत नदिनेका निम्ति पनि काम गर्ने बताएका छन् । उनले भनेका छन्, “सबैको हितका लागि काम गर्नेछु ।”

स्टार्मरले मतदातालाई भनेका छन्, “म तपाईंहरूका निम्ति बोल्नेछु । हरेक दिन तपाईंहरूका लागि लड्नेछु । परिवर्तन गर्न तयार छु ।”

उनले थप भनेका छन्, “परिवर्तन अब सुरु भएको छ । यो तपाईंहरूको लोकतन्त्र हो । तपाईंको समुदाय र तपाईंको भविष्य हो । तपाईंहरूले मत दिनुभएको छ, अब नतिजा दिने समय हाम्रो हो ।”

विपक्षी नेता बन्नुअघि स्टार्मरले सन् २००८ देखि २०१३ सम्म इंग्ल्यान्ड एन्ड वेल्समा वकिलका रूपमा काम गरेका थिए । ६१ वर्षीय स्टार्मर चार वर्षदेखि विपक्षी नेता छन् । उनले लेबर पार्टीलाई वामपन्थी रुझानबाट राजनीतिक रूपमा मध्यमार्गमा लगेको श्रेय पाउँदै आएका छन् । बीबीसीबाट ।