काठमाडौं । बोरुसिया डर्टमन्ड र बायर लेभरकुसेन शनिबार जर्मन बुन्डेसलिगा फुटबलमा पराजित भएका छन् । दुवै टिम घरेलु मैदानमा पराजित भएका हुन् ।
डर्टमन्डले दुई गोलको अग्रता लिए पनि अन्तिम मिनेट सम्हालिन नसक्दा वेर्डर ब्रेमनसँग ३–२ ले पराजित भएको हो । पहिलो हाफको इन्ज्युरी समयमा युलियन ब्रान्डटको गोलबाट डर्टमन्डले अग्रता लिएको थियो । राफायल गुइरेइरोले डर्टमन्डको अग्रता दोब्बर बनाए । दुवै गोलमा कप्तान मार्को रेउसले अवसर सिर्जना गरिदिएका थिए ।
८९औँ मिनेटमा ली बुचाननले गरेको गोलबाट पाहुना टोली वेर्डर ब्रेमनले पुनरागमन गर्यो । पाँच मिनेट इन्ज्युरी समयको तेस्रो मिनेटमा निकलस स्चमिडले बराबरी गोल फर्काए । अन्तिम मिनेटमा ओलिभर बुर्केले अर्को गोल थपेपछि वेर्डर ब्रेमनले नाटकीय विजय हासिल गरेको हो ।
जारी सिजन डर्टमन्डको यो पहिलो हार हो । डर्टमन्डले यसअघि लेभरकुसेन र फ्रेइबर्गलाई पराजित गरेको थियो । डर्टमन्डले तीन खेलबाट ६ अंक जोडेको छ । वेर्डर ब्रेमनको भने यो पहिलो जित हो । वेर्डर ब्रेमनले यसअघि दुवै खेलमा समान २–२ को बराबरी खेलेको थियो ।
लेभरकुसेनले घरेलु मैदानमा होफिनहेइमलाई ३–० को नतिजा सुम्पिएको छ । होफिनहेइमको जितमा क्रिस्टोफ बौमगार्टनर, एनड्रेज क्रमारिक र जर्जिनो रुटरले गोल गरेका थिए । लेभरकुसेन जारी सिजन जितविहीन छ । होफिनहेइमको भने यो लगातार दोस्रो जित हो ।
बुन्डेसलिगाका अरू खेलमा उल्फ्सबर्गले साल्केसँग गोलरहित बराबरी खेल्यो । मोइन्जले औसबर्गलाई २–१ ले हरायो ।