![बेलिङ्घम चम्किँदा इंग्ल्यान्ड क्वार्टरफाइनलमा](https://12khari.top/uploads/posts/448720620_1915484062234841_6691079056695099489_n-1719791301.jpg)
काठमाडौं । इन्जुरी समयको छैटौँ मिनेटमा जुड बेलिङ्घमले हारबाट जोगाउँदा इंग्ल्यान्ड स्लोभाकियाविरुद्ध पुनरागमन जितसहित युरो–२०२४ को क्वार्टरफाइनलमा प्रवेश गरेको छ ।
आइतबार एरिना अफसाल्केमा भएको खेलमा साविक उपविजेता समेत रहेको इंग्ल्यान्ड इन्जुरी समयको चौथो मिनेटसम्म स्लोभाकियाविरुद्ध १–० ले पछि परेको थियो । तर, पाँचौ मिनेटमा बेलिङ्घमले मार्क गेहीको ‘हेडर फ्लिक’ मा उत्कृष्ट एक्रोब्याटिक गोल गर्दै इंग्ल्यान्डलाई खेलमा फर्काएका थिए । स्लोभाकियाविरुद्ध यो नै इंग्लिस टिमले पोस्टमा गरेको पहिलो प्रहार समेत थियो ।
बेलिङ्घमको गोलपछि खेल अतिरिक्त समयमा धकेलिएको थियो । जसमा कप्तान ह्यारी केनले इभान टोनीको पासमा ६ यार्ड बक्सबाट हेडर गोल गर्दै इंग्ल्यान्डलाई २–१ को अग्रतामा राखेका थिए । केनको यही गोल निर्णायक बन्दा साविक उपविजेता इंग्ल्यान्डले पुनरागमन जितसहित उपाधि यात्राको सम्भावना कायम राखेको हो ।
इंग्ल्यान्डले अब सेमिफाइनल प्रवेशका लागि स्वीट्जरल्यान्डविरुद्ध प्रतिस्पर्धा गर्नेछ । यसअघि स्वीट्जरल्यान्डले अन्तिम–१६ को खेलमा साविक विजेता इटालीलाई २–० ले निराश बनाउँदै क्वार्टरफाइनल यात्रा तय गरेको थियो ।
![Global Ime bank](https://baahrakhari.com/uploads/bigyaapan/30885600.gif)