काठमाडौं । तपाईंको घरमा सधैँ एकनासका जोगी भिक्षा माग्न आइरहेका त छैनन् ? यदि त्यस्तो भइरहेको छ भने ख्याल गर्नुहोला । जोगीका भेषमा भिक्षा माग्नेहरू वास्तविक जोगी नभई लुटेरा पनि हुन सक्छन् । 

काठमाडौंको सेतोपुलस्थित उर्मिला श्रेष्ठले यही घटनाको सामना गुर्नपरेको छ ।   बिहीबार बिहानै ८ः४५ बजे गेरुबस्त्रमा भिक्षा माग्दै एक पुरुष र एक महिला उर्मिलाको घरको गेटसम्मै पुगे । उर्मिलालाई लाग्यो, जोगी नै हुन् ।

उनी घरको दोस्रो तल्लामा थिइन् । उनी भिक्षा दिन आफूसँग भएको चानचुन १५ रुपैयाँसहित गेटमा पुगिन् ।  उनले भिक्षा दिइन् र फर्किइन् । तर, भिक्षा माग्न आएका दुवैले उर्मिलाको गेट छाडेनन् । उल्टै १५ रुपैयाँ दिएर फर्किएका उर्मिलालाई फेरि तल ओर्लिन आग्रह गरे ।

भिक्षा माग्नेहरू नफर्किएको र फेरि बोलाएपछि उनी तल नझर्ने कुरै थिएन । उनी तिनलाई भेट्न ओर्लिइन् । त्यसपछि तिनले उर्मिलासँग प्रश्न सोधे, “तपाईंलाई ईश्वरप्रति विश्वास छ कि छैन ?”

उर्मिलाले सहज तरिकाले जवाफ दिइन्, “म ईश्वरप्रति आस्था राख्ने मान्छे हुँ । म पूजाआजा गर्छु ।”

उर्मिलाको यति जवाफ पाएपछि भने भिक्षा माग्न पुगेका दुवै हौसिए ।  महिला भेषमा रहेकी जोगीले आफूसँगै बोकेको एउटा बुटी उर्मिलाको हातमा थमाईंदिइन् । त्यसको पूजा गर्दा राम्रो हुने विश्वास दिइरहेका थिए ।

उनीहरूको आश्वासन एकोहोरो सुनिरहेका उर्मिलालाई थप अर्का आग्रह गरे, कानको मुद्रीको मन्त्र गरी लगाउँदा अझ राम्रो हुन्छ, “हामी पूजा गरिदिन्छौँ । एकछिन खोल्नुस् त ।”

उर्मिलाले मन्त्रका लागि दिएको उनका मुन्द्री हात पारेपछि भने उनीहरू दुवै भागे, फरार भए ।  उर्मिला प्रहरी गुहार्न बाध्य भइन् । उर्मिलाले तत्काल प्रहरीलाई खबर गरेर आफ्नो कानको मुन्द्री चोरेर भिक्षा माग्न आएकाहरु भागेको जानकारी दिइन् ।

उर्मिलाको खबरपछि प्रहरी वृत्त कमलपोखेरीबाट प्रहरी टोली  प्रमुख प्रहरी नायब उपरीक्षक (डीएसपी) इन्द्रप्रसाद सुवेदी आफैँ उर्मिलाको घर पुगे । जोगीको खोजीका लागि प्रहरीको टोली अपरेसनका लागि खटाए ।

११ घण्टाको अपरेशनले खुलायो घटनाको रहस्य

आफ्नै एरियामा जोगीको भेषमा आएकाबाट लुटपाट भएको घटनालाई डीएसपी सुवेदीले गम्भीर रुपमा लिँदै अनुसन्धान थाले । उर्मिलाको घर नजिक जोडिएका ठाउँका ‘सीसीटीभी फुटेज कलेक्सन’ गरे ।

उर्मिलाको घर नजिकैको एउटा सीसीटीभी फुटेजमा गेरुबस्त्र लगाएका दुईजना टेम्पु चढेर जाँदै गरेको फेला पर्‍यो ।  अनुसन्धानमा खटिएको प्रहरी टोलीले टेम्पो गएको बाटोका फुटेज हेर्दै अनुसन्धान अघि बढायो । तर, टेम्पो चढेको केही दुरीमै उनीहरू आर्लिए । टेम्पोको साटो उनीहरूले फेरि ट्याक्सी बुक गरेर हिँडे । प्रहरीले उनीहरू जोगीको भेषमा चोरी र लुटपाट गर्ने समूह भएको निष्कर्ष निकाल्दै दिनभर अनुसन्धानमा जुट्यो ।

प्रहरीले चोरीका घटनामा तिनको संलग्नताको पनि आशंका गरेको थियो । प्रहरीले उनीहरू चढेको ट्याक्सीको नम्बरमार्फत् चालकको नम्बर फेला पार्‍यो । अनुसन्धानमा खटिएको टोलीले चालकलाई फोन गरेर कमलपोखरी बोलाए ।

त्यतिबेला चालक जोगीलाई छाडेर यात्रुको खोजीमा त्रिभुवन विमानस्थल पुगेका थिए । प्रहरीले सोधपुछका लागि बोलाएपछि भने उनी कमलपोखरी आए । प्रहरीले जोगीलाई ट्याक्सीमा छोडेकाबारे सोधपुछ गरे । ट्याक्सी चालकले जोगीलाई बौद्ध नयाँबस्ती छाडेको सूचना दिए । 

त्यही सूचनाका आधारमा प्रहरीले नयाँबस्तीका शंकास्पद ठाउँमा ‘सर्च’ गर्‍यो ।

त्यही क्रममा नयाँबस्तीको एक सुकुम्बासी बस्तीमा तिनीहरू बस्ने गरेको फेला पर्‍यो । सोधपुछका क्रममा सेतोपुल पुगेर फर्किनेमा भारत कर्नालका २६ वर्षीय देबु दया र ४० वर्षीया जेलिना रहेको खुल्यो ।

त्यतिबेला भने उनीहरूले गेरुबस्त्र फुकालिसकेका थिए । 
प्रहरीले उनीहरूमाथि थप केरकार गर्‍यो । प्रहरीको अनुसन्धानका क्रममा भने उर्मिलाको मुद्रा चोरी गर्ने देबु र जेलिना खुलेपछि उनीहरू दुवैलाई कमलपोखरी प्रहरीले ११ घण्टापछि बिहीबार साँझ ७ः२० मा पक्राउ गर्न सफल भएको हो ।

पक्राउ परेका दुवैमाथि अनुसन्धान अघि बढाएको काठमाडौं प्रहरीका एसपी नवराज अधिकारीले जानकारी दिए ।  जोगीको भेषमा उनीहरूले थप अन्य ठाउँमा समेत चोरी गरेको आशंका प्रहरीले गरेको छ । पक्राउ परेकाहरूबाट उर्मिलाको दुवै कानको मुन्द्रा बरामद गरिएको कमलपोखरी प्रहरी वृत्तका प्रमुख डीएसपी सुवेदीको भनाई छ ।