काठमाडौं । जर्जियाविरुद्ध ४–१ को सहज जित निकाल्दै स्पेन युरो–२०२४ को क्वार्टरफाइनलमा प्रवेश गरेको छ ।

आइतबार राति स्पेनलाई जित दिलाउन रोड्री, फाबियन रुइज पेना, निको विलियम्स र ड्यानी ओल्मोले गोल गरे । जर्जियाले स्पेनका रोबिन ले नोर्मान्डबाट एक आत्मघाती गोल उपहार पाएको थियो ।

खेलको १८औँ मिनेटमा रोबिनको आत्मघाती गोलबाट जर्जियाले अग्रता बनाएको थियो । ३९औँ मिनेटमा रोड्रीले गोल फर्काएपछि पहिलो हाफ १–१ को बराबरीमा सकिएको थियो ।

५१औँ मिनेटमा पेनाको गोलमा स्पेनले २–१ को अग्रता बनायो । ७५औँ मिनेटमा विलियम्सले गोल गरेपछि स्पेनले अग्रतालाई ३–१ मा पुर्‍याएको थियो । ८३औँ मिनेटमा ओल्मोले स्पेनको अग्रतालाई ४–१ मा पुर्‍याएका हुन् ।

स्पेनले अब सेमिफाइनल प्रवेशका निम्ति घरेलु टिम जर्मनीसँग खेल्नेछ । जर्मनीले प्रि–क्वार्टरफाइनलमा डेनमार्कविरुद्ध २–० को जित निकाल्दै अन्तिम–८ मा स्थान निश्चित गरेको थियो ।