काठमाडौं । नेपाली मूलका गायक एवं अमेरिकन आइडल फाइनलिस्ट दिवेश पोखरेल (अर्थर गन) बुधबार काठमाडौंको वसन्तपुरमा गुन्जिएका छन् । जन्मथलो आइपुगेकै दिन उनले त्यहाँ प्रस्तुति दिएका हुन् । उनी बुधबारै बिहान काठमाडौं आइपुगेका हुन् ।
बुधबार साँझ उनले वसन्तपुरको नव आदर्श विद्यालयअगाडि प्रस्तुति दिए । उनले ‘स्ट्रिट पर्फोम’ गरेका हुन् ।
त्यहाँको फोटो फेसबुकमा सेयर गर्दै अर्थरले लेखेका छन्, “मैले जहाँबाट सुरु गरेको थिएँ, त्यही गरेँ । जन्मूमिमा बस्किङ (सार्वजनिक स्थलमा स्वेच्छिक दानका लागि गरिएको प्रस्तुति), वसन्तपुर दरबार स्क्वायर । आफ्नो समय दिएर सुनिदिनुभएका तपाईं सम्पूर्ण र जसले यो सम्भव गरायो, तपाईं सम्पूर्णलाई धन्यवाद । सबैलाई अगस्ट २० मा क्लब प्लाटिनममा भेट्नेछौँ ।”
उनी आउँदो शनिबार काठमाडौंको क्लब प्लाटिनममा गुन्जिँदै छन् । एक महिनाका लागि नेपाल टुरमा आएका अर्थरको दोस्रो प्रस्तुति यही अगस्ट २४ मा चितवन, अगस्ट २६ मा पोखरा र त्यसपछि अगस्ट ३१ मा बुटवलमा हुने तय छ ।
सन् २०२० को अमेरिकन आइडलका फर्स्ट रनरअप उनी त्यसपछि पहिलोपटक नेपाल आएका हुन् । नेपाल आइपुगेर उनी सिधै जन्मघर कलंकी गएका थिए । त्यहाँ भव्य स्वागत गरियो ।
उनको दोस्रो चरणको प्रस्तुति आउँदो सेप्टेम्बरदेखि सुरु हुनेछ । उनी केही पर्यटन प्रवर्द्धनका कार्यक्रमहरूमा पनि सहभागी हुने बताइएको छ ।
