![धौलागिरि लघुवित्तको आईपीओमा मागभन्दा साढे ६५ गुणा बढी आवेदन](https://12khari.top/uploads/posts/ipobp11613537276.jpg)
काठमाडौं । धौलागिरि लघुवित्त वित्तीय संस्था लिमिटेडले साउन २४ गतेदेखि निष्कासनमा ल्याएको प्राथमिक सेयर (आईपीओ)मा मागभन्दा साढे ६५ गुणा बढी कित्ताका लागि आवेदन परेको छ । सिडिएस एन्ड क्लियरिङ (सीडीएससी) का अनुसार आवेदन दिन अन्तिम दिन आज साँझ ५ बजेसम्म मागभन्दा ६५.६२ गुणा बढी कित्ताका लागि आवेदन परेको हो ।
कम्पनीले १०० रुपैयाँ अंकित मूल्यका दरले हुन आउने तीन करोड ३१ लाख रुपैयाँ बराबरका तीन लाख ३१ हजार कित्ता आईपीओ सर्वसाधारणका लागि निष्कासन गरेको थियो । तर, आवेदन दिने अन्तिम दिनसम्म दुई करोड १७ लाख २१ हजार ५७० कित्ता आईपीओका लागि आवेदन परेको सीडीएससीले जानकारी दिएको छ । उक्त आईपीओ खरिदका लागि १९ लाख ५२ हजार ४६० जना आवेदकबाट आवेदन परेको छ ।
कम्पनीले निष्कासन गरेको कुल सेयरमध्ये ०.५ प्रतिशत अर्थात् पाँच हजार १५५ कित्ता कर्मचारीहरूका लागि र ५ प्रतिशत अर्थात् १६ हजार ५५० कित्ता सेयर सामूहिक लगानी कोषहरूलाई बाँडफाँट गरिएको छ । बाँकी रहेको तीन लाख नौ हजार २९५ कित्ता आईपीओ मात्र सर्वसाधारणमा बाँडफाँट हुनेछ ।
लगानीकर्ताले न्यूनतम १० कित्तादेखि एक हजार कित्तासम्मका लागि आवेदन दिन पाउने व्यवस्था गरिएको थियो ।
![Global Ime bank](https://baahrakhari.com/uploads/bigyaapan/30885600.gif)