विराटनगर । विराटनगर महानगरपालिकाका प्रमुख र उपप्रमुखले सरकारी गाडी सुविधा लिन सुरु गरेका छन् ।

महानगरका प्रमुख नागेश कोइरालाले आफ्नो सचिवालयमार्फत सूचना जारी गर्दै सरकारी गाडी सुविधा लिने जनाएका छन् । उपप्रमुख शिल्पा निराला कार्कीले यसअघि नै सरकारी गाडी चढ्न थालिसकेकी छन् ।

गएको स्थानीय तह निर्वाचनअघि कोइराला र कार्कीले सरकारी गाडी नचढ्ने घोषणा गरेका थिए । “सरकारी गाडी प्रयोग नगर्ने निर्णय गरेको तर निर्वाचित भएर आएपछि निजी गाडीमा प्राप्त हुने तेल प्रयोग गर्दा पछि बेरुजु देखाउने भएको र गाडी धेरै लामो समयसम्म नचलाउँदा पछि त्यसको मर्मत गर्दा महानगरकै ठूलो रकम खर्च हुने भएकोले गाडी प्रयोग गर्ने निर्णयमा पुगेको,” मेयर कोइरालाको सूचनामा भनिएको छ ।

महानगरका जनप्रतिनिधि, कर्मचारी, प्राविधिक र शुभेच्छुकले समेत गाडी प्रयोग गर्न बारम्बार सुझाव दिएको कोइरालाको भनाइ छ ।

उपप्रमुख कार्कीले भने यसअघि नै गाडी सुविधा लिइसकेकी छिन् । उनले पनि त्यति बेला एक चुनावी घोषणासभामा सरकारी गाडी नचढ्ने जनाएकी थिइन् । कार्कीले पूर्वउपप्रमुखले चढ्ने गाडीको सट्टा पूर्वमेयरले चढ्ने गाडी रोजेकी छन् ।