काठमाडौं । राष्ट्रपति भवन शीतलनिवासअगाडि शुक्रबार आत्मदाह गर्न खोज्ने २० वर्षीया निहारिका राजपुतलाई प्रहरीले नियन्त्रणमा लिएको छ ।

उनलाई उपचारका लागि त्रिवि शिक्षण अस्पताल लगिएको काठमाडौं प्रहरी प्रमुख एसएसपी भरत बोहराले जानकारी दिए ।

आफू बलात्कृत भएको र प्रशासनले सहयोग नगरेको गुनासो गर्दै उनले आत्मदाह गर्ने भन्दै शरीरमा पेट्रोलियम पदार्थ खन्याएकी थिइन् । उनले आफ्नो बच्चाको डीएनए जाँचको माग गर्दै आएकी छन् ।

जनकपुरका शिवराज श्रेष्ठले आफूलाई बलात्कार गरेर 'ब्ल्याकमेल' गरेको निहारिकाको आरोप छ ।

जिल्ला अदालत धनुषाले श्रेष्ठलाई सफाइ दिएको थियो । उच्च अदालत जनकपुरमा भने निहारिकाको मुद्दा विचाराधीन छ ।