काठमाडौं । काठमाडौंमा कल सेन्टरबाट करिब ७०० अमेरिकी नागरिकसमेत ठगिएको खुलेको छ ।

नेपाल प्रहरीको साइबर ब्युरोले गत असार पहिलो साता धुम्बाराहीस्थित अर्बिट नेक्सस प्रालिमा छापा मारेको थियो । सो क्रममा १३ जना पक्राउ परेका थिए ।

अनुसन्धानका क्रममा कल सेन्टरबाट ७०० को हाराहारीमा अमेरिकी नागरिकसमेत ठगिएको पाइएको ब्युरोका प्रवक्ता एसपी पशुपति रायले जानकारी दिए ।

घटनाकाबारे इन्टरपोलमार्फत पनि जानकारी दिने काम भइरहेको एसपी रायले बताए ।

अमेरिकी नागरिक ठगिएकोबारे अमेरिकन प्रहरीको फेडेरल ब्युरो अफ इन्भेस्टिगेसनले चासो राखेको बताइएको छ ।  यसबारे साइबर ब्युरोसँग भने कुनै समन्वय र सम्पर्क नभएको रायले बताए ।