जलेश्वर । महोत्तरीको गौशाला नगरपालिकामा आज डन्डी बोकेको ट्रकले ठक्कर दिँदा एक मोटरसाइकल चालकको मृत्यु भएको छ ।

इलाका प्रहरी कार्यालय गौशालाका प्रहरी निरीक्षक रञ्जन मिश्रका अनुसार गौशाला–४ स्थित सुर्ती विकास चोकमा डन्डी बोकेको ना४ख ३३३९ नम्बरको ट्रकले ‘अनटेस्ट’ मोटरसाइकलमा सवार स्थानीय दिलीप सहनीलाई ठक्कर दिँदा उनको मृत्यु भएको हो ।

बर्दिबासतिरबाट डन्डी बोकेर गौशालातिर आउँदै गरेको ट्रकले विपरीत दिशाबाट जाँदै गरेको दिलीपलाई सुर्ती विकास चोकको गोलम्बरनजिक ठक्कर दिँदा उनी गम्भीर घाइते भएका थिए । उपचारका लागि प्रादेशिक अस्पताल जनकपुर लगिएको थियो । उपचारकै क्रममा उनको मृत्यु भएको प्रहरी निरीक्षक मिश्रले बताए ।

मृतक दिलीपको शव परीक्षणका लागि सोही अस्पतालमा राखिएको छ । ठक्कर दिने डन्डी बोकेको ट्रक र चालक इलाका प्रहरी कार्यालय गौशालाको नियन्त्रणमा छन् । रासस