काठमाडौं । प्रमुख प्रतिपक्ष दल नेकपा (एमाले)का सांसद महेश बस्नेतले अर्थमन्त्री जनार्दन शर्माप्रति संसद्मा व्यंग्य गरेका छन् ।

मंगलबार प्रतिनिधिसभा बैठकको शून्य समयमा उनले ‘सहयोग नगर्ने कर्मचारी हटाउने, कमिसन नखुवाउने उद्योगीहरूलाई कारबाही गर्ने, निर्वाचन खर्च जुटाउने, गठबन्धन जिताउन, एमाले हराउन लाग्ने’ भन्दै अर्थमन्त्री शर्माप्रति कटाक्ष गरेका हुन् ।

उनले अर्थमन्त्री शर्माप्रति जनताले सबै मूल्यांकन गरेको भन्दै महँगी, भ्रष्टाचार, अनियमितता र कुशासनको हिसाब गर्ने बताए ।

यस्तै, जनता समाजवादी पार्टी (जसपा)की सांसद रेनुका गुरुङले सोमबार राति आफ्नो घरको गेटभित्र बम पड्काइएको बताइन् । उनले सुरक्षाको कारण देखाउँदै आजीवन निजी सुरक्षाकर्मीको व्यवस्था गर्न गृहमन्त्री र सरकारसँग माग गरिन् ।

“मेरो देशलाई शिरमा बोकेर हिँड्ने म नेपाल आमाकी छोरी हुँ । मैले जिन्दगीभर देश र समाजको लागि सेवा गरेबापत मसँग प्रशंसापत्र र प्रमाणपत्रको थुप्रो छ । हिजो राति ८ बजेर २५ मिनेट जाँदा मैले देशलाई माया गरेको मन नपराउने देशद्रोहीहरूले मेरो घरको गेटभित्र बम पड्काए । घरका सबै आतंकित भए । झ्याल खोलेर हेरेँ, दुईजना लोग्नेमानिस मोटरसाइकलमा गएको देखेँ । तर, अँध्यारो भएकोले चिन्न सकिनँ,” उनले भनिन्, “महाराजगन्जको थानाको नम्बर खोजेर फोन गरेँ । माननीय गृहमन्त्रीलाई फोन गरेँ, फोन उठेन । प्रहरी आएपछि म पनि आँगनमा ओर्लिएँ । कम्पाउन्डभित्र रकेट बमको खोल भेटियो, जुन प्रहरीले लिएर गएको छ । त्यसपछि माननीय उपसभामुख पुष्पा भुसाललाई फोन गरेँ, सान्त्वना दिनुभयो ।”

उनले थपिन्, “अतः म संघीय सांसद र कार्यपालिकाको सदस्य भइसकेकाले म र मेरो घर परिवारको सुरक्षार्थ पूर्वराज्यमन्त्रीले पाउनुपर्ने अनिवार्य पीएसओको आजीवन व्यवस्थाका लागि गृहमन्त्री र नेपाल सरकारसँग माग गर्दछु ।”

नेपाली कांग्रेसका सचेतक मीनबहादुर विश्वकर्माले नेपाल चक्रवर्ती कलेजले कानुन संकायको शुल्क बढाउँदा आन्दोलन गर्ने विद्यार्थीमाथि प्रहरी र बाउन्सर लगाएर कुटपिट गरिएको विषयमा सरकारको ध्यानाकर्षण गराए ।

सांसद मीना सुब्बाले सरकारी र निजी विद्यालयका विद्यार्थीको शैक्षिक पहुँच समान बनाउन सरकारसँग माग गरिन् ।

सांसद मोहन बानियाँले कर्णाली करिडोर निर्माणकार्यमा नेपाली सैनिक थप गर्न सरकारसँग माग गरे । कर्णाली करिडोर निर्माणकार्य सुस्त भएको उनले बताए । 

सांसद मोहनप्रसाद पाण्डेले पाल्पा जाने सडक कालीगण्डकीको पानीले जलमग्न भएकाले वैकल्पिक मार्ग तत्काल बनाएर सवारी सञ्चालनमा सहजीकरण गर्न सरकारसँग माग गरे ।

सांसद यशोदा गुरुङ सुवेदीले सरकारले विप्लव समूहलाई जारी गरेको पक्राउ पुर्जी फिर्ता लिन माग गरिन् । सरकारले विप्लवसँग गरेको सहमति कार्यान्वयन गर्नुपर्ने बेलामा कारबाही गर्ने कार्य रोक्नुपर्ने उनले बताइन् ।