बुटवल । अर्घाखाँचीमा एक वर्षमा दुई सयभन्दा बढी सम्बन्ध विच्छेदका मुद्दा दर्ता भएका छन् । अर्घाखाँची जिल्ला अदालतमा आएका मुद्दामा सम्बन्ध बिच्छेदका मुद्दा सबैभन्दा बढी रहेका छन् । एक वर्षमा दुईसय सम्बन्ध विच्छेदका मुद्दा परेका छन् ।

जिल्ला अदालतले आर्थिक वर्ष २०७८/०७९ को वार्षिक लक्ष्य र प्रगतिको समीक्षा कार्यक्रममा सो जानकारी दिएको हो ।

अदालतमा परेका ४७४ मुद्दामध्ये २०६ सम्बन्ध विच्छेदका मुद्दा रहेको अदालतका श्रेष्तेदार महेश खनालले जानकारी दिए । केही वर्षयता सम्बन्ध विच्छेद भयावह बन्दै गएको छ । बर्सेनि  सम्बन्ध विच्छेद गराउनेको संख्या डरलाग्दो रूपले वृद्धि हुँदै गएको हो । अदालतमा आउने मुद्दामध्ये सबैभन्दा बढी सम्बन्ध विच्छेद नै रहेका छन् ।

सम्बन्ध बिच्छेदका मुद्दा बढ्नुको कारण अपरिपक्क विवाह, पारिवारिक असन्तुलन, घरेलु हिंसा, वैदेशिक रोजगार, महिला सशक्तिकरणको कमीलगायत रहेका अनुमान गर्ने गरिएको छ । 

हरेक वर्ष बढ्दै जाने सम्बन्ध विच्छेदका घटनाले परिवारको शिक्षा, स्वास्थ्य तथा जीविकालाई समेत प्रभाव पार्ने गरेको छ ।

यसअघि पुरुषले स्थानीय तहमा मिलापत्र हुन नसके स्थानीय तहको सिफारिसमा मात्र अदालतमा मुद्दा दर्ता गर्न पाउने प्रावधान थियो । पत्नीसँग सम्बन्ध विच्छेदका लागि पतिले मुद्दा दायर गरे पनि अदालतले मेलमिलापका लागि एक वर्षको समय तोक्ने व्यवस्था थियो । तर, पछिल्लो कानुनले प्रक्रियामा सहज बनाएपछि पुरुषहरू पनि सम्बन्ध विच्छेदमा अग्रसर हुने गरेको देखिएको हो ।

गत आर्थिक वर्ष २०७७/०७८ मा जिल्ला अदालत अर्घाखाँचीमा सम्बन्ध विच्छेदका १२३ वटा मुद्दा परेका थिए । गत वर्षको तुलनामा यस वर्ष ८३ वटा सम्बन्ध विच्छेदका मुद्दा बढेको छ ।