काठमाडौं । नेपाल क्रिकेट संघ (क्यान)को आयोजना हुन लागेको नेपाल टी–२० फ्रेन्चाइज क्रिकेट लिगका लागि सोमबार चार टोलीको घोषणा गरिएको छ । 

असोज ८ देखि कात्तिक ५ गतेसम्म कीर्तिपुरस्थिति त्रिभुवन विश्वविद्यालयको मैदानमा हुन लागेको प्रतियोगिताका लागि क्यानले व्यावसायिक तथा रणनीतिक साझेदार बनाएको ‘सेभेन थ्री स्पोर्टस’ले चार टिम र टिम मालिकको नाम सार्वजनिक गरेको हो । 

चार टिममा कान्तिपुर क्यापिटल, लुम्बिनी अल स्टार्स, विराटनगर सुपरकिंग्स र जनकपुर रोयल्स रहेका छन् ।  

कान्तिपुर क्यापिटलको टिम मालिकमा महेश स्वाँर, लुम्बिनी अल स्टारमा अमेरिकी मालिक सन्जय शर्मा छन् । भारतीय कम्पनी डायमन्ड डिजिक्याप प्रालिका विक्रम यादव विराटनगर सुपरकिंग्सका मालिक रहेका छन् ।  जनकपुर रोयल्सको स्वामित्व गोल्ड स्पोर्ट्स प्रालिका गौरी शंकर धमानीले पाएका छन् । 

पहिलो संस्करणको प्रतियोगितामा ६ टोलीले प्रतिस्पर्धा गर्नेछन् ।

बाँकी दुई टिमको नाम र टिम मालिक चाँडै सार्वजनिक गरिने क्यानले जनाएको छ ।

क्यानले यस प्रतियोगितालाई नेपालको पहिलो र एकमात्र आधिकारिक ट्वान्टी–२० क्रिकेट लिग भनेर दाबी गरेको छ । अन्तर्राष्ट्रिय क्रिकेट परिषद् (आईसीसी)ले नेपाल टी–२० लिगलाई मान्यता दिएको छ भने राष्ट्रिय खेलकुद परिषद्ले पनि मान्यता दिइसकेको छ । 

नेपाल क्रिकेट संघले आफ्नो ‘ड्रीम प्रोजेक्ट’ भनेर हेरिएको प्रतियोगिताका लागि सेभेन थ्री स्पोर्ट्स प्राइभेट लिमिटेडलाई व्यावसायिक र रणनीतिक साझेदारका रूपमा भित्र्याएपछि क्रिकेटकाे एक पक्षले आलोचना गरेका छन् ।