काठमाडौं । आईसीसी पुरुष विश्वकप लिग–२ त्रिकोणात्मक एकदिवसीय सिरिजमा नेपाल फेरि पनि नामिबियासँग पराजित भएको छ ।

स्कटल्यान्डमा गए राति सम्पन्न खेलमा नेपाल नामिबियासँग ६३ रनले पराजित भएको हो । जारी सिरिजमा यसअघि भएको पहिलो खेलमा पनि नेपाल नामिबियासँग ४० रनले पराजित भएको थियो ।

नामिबियाले जितका लागि नेपाललाई २०० रनको लक्ष्य दिएको थियो । जवाफमा नेपाल ३७.५ ओभरमा सबै विकेट गुमाउँदै १३६ रनमा समेटियो ।

नेपालका लागि दीपेन्द्रसिंह ऐरीले सर्वाधिक ३८ रन बनाए । यस्तै, आसिफ शेखले ३४ रन जोड्दा आदील आलमले २० रन बनाए । रोहित पौडेलले १७ तथा पवन सर्राफ १० रनमा अविजित रहे ।

आरिफ शेखले चार रन तथा देव खनाल र सोमपाल कामीले एक/एक रन जोडे भने कुशल भुर्तेल, कप्तान सन्दीप लामिछाने र बसिर अहमेदले खाता खोल्न सकेनन् ।

नामिबियाका बेर्नार्ड स्कोल्ट्जले पाँच विकेट लिए भने जान फ्राइलिंकले तीन विकेट लिए ।

त्यसअघि, टस जितेर पहिले ब्याटिङ गरेको नामिबियाले ४९.२ ओभरमा सबै विकेट गुमाउँदै १९९ रन बनाएको थियो । नामिबियाका लागि कप्तान जेहार्ड एरास्मसले सर्वाधिक ५३ रनको योगदान दिए ।

यस्तै, डेभिड विएसले ३४ रन जोड्दा जेजे स्मिथ र डिभान ला ककले समान २७ रन जोडे । जान निकोल र रुबेन ट्रम्पेलम्यानले समान १९ रन बनाए ।

नेपालका कप्तान सन्दीप लामिछानेले चार विकेट लिए भने सोमपाल कामी र दीपेन्द्रसिंह ऐरीले समान दुई/दुई विकेट लिए । बसिर अहमेदले एक विकेट लिए ।

स्कटल्यान्डसँग भिड्दै
सिरिजअन्तर्गतको अन्तिम खेल नेपालले आज स्कटल्यान्डसँग खेल्नेछ । यसअघि भएको खेलमा नेपालले स्कटल्यान्डलाई पाँच विकेटले हराएको थियो ।

हारसँगै नेपाल लिग–२ को अंकतालिकाको छैटौँ स्थानमा झरेको छ । नेपालले १९ खेलबाट १७ अंक जोडेको छ । नामिबिया भने १८ खेलबाट १८ अंक जोडेर पाँचौँ स्थानमा उक्लिएको छ । रासस