काठमाडौं । बारामा हातहतियारसहित दुईजना पक्राउ परेका छन् । कोल्हवी नगरपालिका, ३ सखुहवा जडिबुटीबाट एकथान थ्रिनटथ्रीजस्तो देखिने घरेलु हतियार, एक थान भरुवा बन्दुकजस्तो देखिने घरेलु हतियार र चार राउण्ड गोली सहित दुईजना शुक्रबार दिउँसो पक्राउ परेका छन् । 

पक्राउ पर्नेमा कोल्हवी नगरपालिका ३ बस्ने ५० वर्षीय सुवन्स चौधरी र सोही नगरपालिका ५ बस्ने ४२ वर्षीय दीपेन्द्र चौधरी छन् । सब डिभिजन बन कार्यालय कोल्हवी र तामागढी बन ब्यवस्थापनबाट खटिएको संयुक्त गस्ती टोलीले उनीहरूलाई उक्त हातहतियारसहित फेला पारी आवश्यक अनुसन्धानको लागि ईलाका प्रहरी कार्यालय कोल्हवीमा बुझाएको छ । 

रुकुम (पूर्व), सिस्ने गाउँपालिका ५ रुमालबारा घट्टेखोलास्थित जंगलबाट एक थान लोड भएको भरुवा बन्दुक शुक्रबार राति प्रहरीले बरामद गरेको छ । उक्त स्थानमा भरुवा बन्दुक बेवारिसे अवस्थामा रहेको भन्ने सूचनाको आधारमा जिल्ला प्रहरी कार्यालय रुकुम पूर्वबाट खटिएको प्रहरीले उक्त बन्दुक फेला पारी बरामद गरेको हो ।

यसबारे प्रहरीले थप अनुसन्धान गरिरहेको छ ।