काठमाडौं । यही असार १२ गते थापाथलीस्थित नर्भिक इन्टरनेसनल हस्पिटलमा जटिल समस्या लिएर आएकी एक किशोरीको सफतलापूर्वक उपचार गरियो । १२ गते आइतबार साँझ झन्डै पाँच बजेको समयमा १७ वर्षीया किशोरी पेटको समस्या लिएर थापाथलीस्थित नर्भिक अस्पताल आइपुगेकी थिइन् । 

सामान्य अवस्थामा आइपुगेकी उनले आफ्नो मुखबाट चम्चाभित्र छिरेको बताएपछि नर्भिक अस्पतालका पेट कलेजो रोग विशेषज्ञ, विभागीय प्रमुख डा. सन्दीपराज कुँवर नेतृत्वको टोलीले ती किशोरीको उपचार प्रक्रिया सुरु गरेको थियो । 

भिडियो एक्स्रेमा उनको पेटमा झन्डै १० १२ सेन्टिमिटरको चम्चा आमाशयमा पुगेर अड्किएको देखियो । ४५ मिनेट लामो जटिल इन्डोस्कोपी प्रक्रियापछि सो चम्चा निकालिएको थियो । असार १३ गते सोमबार बिहानसम्म किशोरीको अवस्था सामान्य भइसकेको थियो । अस्पतालले उनलाई सोमबार बिहान नै डिस्चार्ज गरेको थियो । 

डा. कुँवरका अनुसार विशेषगरी बालबालिका र मदिरा सेवन गर्ने व्यक्तिहरूमा अन्जानबस पेटमा खाद्यनली तथा पेटमा सिक्का, पिन, फलफूलको दानाजस्ता वस्तुहरू अड्किने घटना धेरै भएको पाइएको छ । कुनै धारिलो वस्तु पेटसम्म पुगेमा त्यसले आन्द्रा प्वाल पार्ने, सम्भावना बढी हुन्छ । यस्तो अवस्थामा उपचार ढिलो भएको भए सानो आन्द्रा प्वाल पर्ने, पेटभित्र रक्तश्राव हुने, अन्य खानेकुरा समेतलाई ब्लक गरी जटिल समस्या निम्तिन सक्ने सम्भावना रहन्छ । 

यस्तै, एउटा जटिलमध्येको एक समस्या लिएर आएकी थिइन् ती किशोरी । यो केस आफ्नो कार्यकालमा अहिलेसम्मकै नयाँ अनुभव भएको बताउने डा. कुँवरको टिमले कसरी सफलतापूर्वक ती बिरामीको सकुशल उपचार गर्‍यो ? यिनै विषयमा केन्द्रित रहेर बाह्रखरीकर्मी अस्मिता रिजालले नर्भिक इन्टरनेसनल हस्पिटलका पेट कलेजो रोग विशेषज्ञ डा. सन्दीपराज कुँवरसँग गरेको भिडियो कुराकानी :