काठमाडौं । आसन्न स्थानीय तह निर्वाचनको चहलपहल सुरु भएको छ । कतिपय स्थानमा उमेदवारी घोषणा समेत भइसकेको छ । पार्टीहरू आन्तरिक छलफलमा व्यस्त छन् । आउँदो वैशाख ३० गते स्थानीय निर्वाचन हुँदै छ ।

सुदूरपश्चिम प्रदेशमा पनि निर्वाचनको माहोल तात्दै छ । सुदूरपश्चिममा धनगढी उपमहानगरपालिकापछि भीमदत्तनगर नगरपालिकाको जनप्रतिनिधिका बारेमा बढी चासो छ ।

कञ्चनपुरको सबैभन्दा पुरानो नगरपालिका भीमदत्तमा यसअघि नेकपा (एमाले)ले मेयरमा बाजी मारेको थियो । उपमेयरमा नेपाली कांग्रेसका उमेदवार विजयी भएका थिए ।

योपटक पनि भीमदत्तमा निर्णायक प्रतिस्पर्धा एमाले र कांग्रेसकै हुने देखिएको छ । भीमदत्तनगर कांग्रेसका नेता रमेश लेखक, एमाले नेताहरू नीरुदेवी पाल, दीपकप्रकाश भट्टलगायत व्यक्तिको क्षेत्र हो ।

०६४ सालको संविधानसभा निर्वाचनमा भीमदत्तनगर नगरपालिकासहितको निर्वाचन क्षेत्रबाट शेरबहादुर देउवा निर्वाचित भएका थिए ।

०७४ को स्थानीय तह निर्वाचनमा कांग्रेसका उमेदवार पदम बोगटीलाई १६६ मतान्तरले हराउँदै एमालेका सुरेन्द्र विष्ट विजयी भए । अहिले विष्ट एमाले जिल्ला अध्यक्ष छन् भने बोगटी कांग्रेस जिल्ला सभापति छन् ।

मेयरमा विष्टले ११ हजार ८३१ मत प्राप्त गर्दा निकटतम प्रतिद्वन्द्वी कांग्रेसका बोगटीले ११ हजार ६६५ मत पाएका थिए ।

उपमेयरमा कांग्रेसकी सुशीला चन्द सिंह १२ हजार ७७५ मत ल्याएर विजयी भएकी थिइन् । उनका निकटतम प्रतिस्पर्धी एमाले उमेदवार माया पन्तले ११ हजार ८३६ मत प्राप्त गरेकी थिइन् ।

पहिलो, दोस्रो स्थानमा एमाले र कांग्रेस देखिएको थियो भने माओवादी र राप्रप्रा तेस्रो र चौथो स्थानमा थिए ।

अहिले एमाले विभाजित छ । माधव नेपाल समूहका नेताहरू छुट्टै पार्टीमा छन् । तर पनि निर्णायक भिडन्त भने एमाले र कांग्रेसकै हुने देखिन्छ ।

तर, सत्तारूढ दलबीच गठबन्धन भएको अवस्थामा भने एमालेलाई आफ्नो साख कायम राख्न सहज हुने छैन ।

यद्यपि, विभाजनको असर न्यून भएकाले एमालेलाई खासै असर नपर्ने दाबी छ, एमाले पोलिटब्युरो सदस्य तथा कञ्चनपुर जिल्ला इन्चार्ज नीरुदेवी पालको । उनका अनुसार भीमदत्तको मेयरका लागि पार्टीभित्र एक दर्जन बढी आकांक्षी छन् । पालले बाह्रखरीसँग भनिन्, “जसले चुनाव जित्न सक्छ उसैलाई उमेदवार बनाउने हो । हामी छलफलमै छौँ । उपयुक्त समयमा निर्णय गर्छौँ ।”

एमालेभित्र विष्टलाई मेयरमा दोहोर्‍याउने चर्चा छ । कांग्रेसले पनि मेयरमा पुरानै उमेदवार बोगटीलाई अगाडि सार्ने सम्भावना बढी छ ।

कांग्रेसमा पनि आधा दर्जन बढी आकांक्षी छन् । बोगटीले अहिले को उमेदवार बन्ने भनेर तय भइनसकेको बताए । तर, पार्टीले निर्णय गरेर उमेदवार बनाए आफू मैदानमा जान तयार रहेको उनको भनाइ छ ।

०७४ को निर्वाचनमा नेकपा (माओवादी केन्द्र)का मेयर पदका उमेदवार गोपाल रसाइलीले चार हजार ५७९ मत पाएका थिए । राप्रपाका मेयर पदका उमेदवार गजेन्द्रबहादुर चन्दले चार हजार ३२८ मत ल्याएका थिए ।

१९ वडा रहेको भीमदत्तनगरमा १० वडाध्यक्ष एमालेले जितेको थियो । कांग्रेसले सात र माओवादी केन्द्र दुईमा विजयी भएको थियो ।

एमालेबाट माधव नेपाल समूह बाहिरिएपछि नेपाल नेतृत्वको पार्टीमा दुई निर्वाचित वडाध्यक्ष लागेका छन् । नेकपा (एकीकृत समाजवादी)का तर्फबाट मेयरका लागि खेम भण्डारीको नाम चर्चामा छ ।

०७४ को निर्वाचनमा ३७ हजारभन्दा बढी मत खसेको थियो । भीमदत्तनगरमा ०७४ को निर्वाचनमा ५६ हजार मतदाता थिए ।

मुख्य प्रतिस्पर्धा एमाले र कांग्रेसबीच हुने देखिन्छ । राप्रप्रा र माओवादी एकल रूपमा निर्वाचनमा गए उनीहरूका उमेदवारले जित्ने सम्भावना झिनो देखिन्छ । तर, गठबन्धन बनेको अवस्थामा नजितामा फेदबदल ल्याउन सक्ने हैसियतमा माओवादी र राप्रप्रा छन् ।