काठमाडौं । नेपाली क्रिकेट टोलीलाई अस्ट्रेलियामा हुने आईसीसी ट्वान्टी–२० विश्वकप–२०२२ मा खेलेको हेर्न पाइन्छ त ? पछिल्लो समय नेपाली क्रिकेटप्रेमीको मनमा खेल्ने प्रश्न यही हो । यसमा खेलाडीको आत्मविश्वास हेर्ने हो, सकिन्छ । खेलाडी, कप्तान र प्रशिक्षक त्यही भन्छन् ।

टिमका अनुभवी अलराउन्डर शरद भेषावकरको कुरा सुन्ने हो भने नेपाल दुई खेलको नतिजाले मात्र अस्ट्रेलिया भ्रमणबाट टाढा छ । आइतबार कीर्तिपुरस्थित त्रिवि क्रिकेट मैदानमा अन्तिम तयारी गरिरहेका शरदले भने, “वास्तवमै भन्ने हो भने, दुई खेलको कुरा हो । त्यसमा आफ्नो क्षमताअनुसार खेल्यो भने हामी विश्वकपमा पुग्नेछौँ ।”

आईसीसी ट्वान्टी–२० विश्वकप–२०२२ का लागि ओमानमा हुने ग्लोबल क्वालिफायर खेल्नका लागि नेपाली टोली मंगलबार त्यसतर्फ प्रस्थान गर्दैछ । ग्लोबल क्वालिफायर खेल्नुअघि नेपालले ओमान, यूएई र आयरल्यान्डविरुद्ध अभ्यास खेल खेल्नेछ । ओमान त्यही टिम हो, जुन क्वालिफायरमा नेपालकै समूहमा छ । 

ग्लोबल क्वालिफायरको समूह ‘ए’मा पनि नेपाल रहेको समूह ‘दुई’मा क्यानडा, ओमान र फिलिपिन्स छन् । सरसर्ती हेर्दा नेपालको मुख्य प्रतिद्वन्द्वी ओमान देखिएको छ । शीर्ष दुई टोलीले सेमिफाइनल खेल्नेछन् । अर्को समूह ‘एक’मा बहराइन, जर्मनी, आयरल्यान्ड र युनाइटेड अरब इमिरेट्स (यूएई) छन् । त्यस समूहबाट आयरल्यान्ड र यूएईको सम्भावना बलियो देखिन्छ । समूह ‘ए’बाट फाइनल खेल्ने दुई टोलीले अस्ट्रेलियाको टिकट पक्का गर्नेछ । 

शरदले त्यसैकारण ‘दुई खेल’को कुरा भनेका हुन् । यसअघि नेपालले बंगलादेशमा सम्पन्न २०१४ को विश्वकप खेलेको थियो । त्यसपछि विश्वकप छनोटमा नेपालको प्रदर्शन कमजोर रहेको छ । २०१४ को विश्वकप छनोट प्रतियोगिता खेलेका शरदसहित ज्ञानेन्द्र मल्ल, जितेन्द्र मुखिया र प्रदीप ऐरी ओमान भ्रमणको टोलीमा पनि समावेश छन् । संयोग त्यतिबेला विश्वकप खेल्दाको मुख्य प्रशिक्षक पुबुदु दासानायके पनि अहिलेको टोलीमा छन् ।

त्यतिबेला र अहिलेको टोलीमा के फरक छ त ? उनै अनुभवी शरद भन्छन्, “पहिले टिम यस्तो तयार हुँदैनथ्यो । त्यतिबेला पावर हिटरहरू थिएनन् । अहिले धेरै फरक छ । खेलाडीहरू सबै रूपमा खेल्नका लागि तयार छन् । अब त्यो दिन राम्रो क्रिकेट खेल्यौँ र योजना कार्यान्वयन गर्न सक्यौँ भने नतिजा पनि राम्रो आउँछ ।”

शरदले भनेको जस्तै अहिलेका कप्तान सन्दीप लामिछाने पनि विश्वकपमा छनोट हुनेमा विश्वस्त छन् । कप्तानमा रूपमा सन्दीपका लागि यो पहिलो प्रतियोगिता हो । नेपालले पहिलोपटक विश्वकप खेल्दा सन्दीप १४ वर्षका मात्र थिए । उनी क्रिकेटमा भर्खरै बामे सर्दै थिए । अहिले सन्दीप विश्व क्रिकेटको 'स्टार' बनिसकेका छन् । नेपाललाई दोस्रोपटक विश्वकप खेलाउने गह्रौँ जिम्मेवारी सन्दीपको काँधमा आएको छ । 

“२०१४ मा पारस दाइले एउटा लिगेसी छाडेर जानुभएको छ । अब हाम्रो काँधमा त्यसलाई अघि बढाउने जिम्मेवारी थपिएको छ,” कप्तान सन्दीपले भन्छन्, “फेरि विश्वकप खेल्ने मेरो र सम्पूर्ण नेपालीको चाहना हो । यसपटक टिम पनि राम्रो बनेको छ । हामीले जुन हिसाबले तयारी गरेका छौँ । त्यसबाट हामी विश्वस्त छौँ । एउटा राम्रो सम्भावना बोकेर हामी ओमान जादैछौँ ।”

शरदले दुई खेल भनेको जस्तै मुख्य प्रशिक्षक पुबुदु दासानायके पनि नेपालको प्रमुख प्रतिद्वन्द्वी ओमान, आयरल्यान्ड र ओमान भएको बताउँछन् । मुख्य प्रशिक्षक पुबुदु पनि नेपाल विश्वकपमा छनोट हुनेमा विश्वस्त छ ।

“सबै योजनाअनुसार नै भइरहेका छन् । टिम जसरी अघि बढेको छ, त्यसबाट म खुसी छु । अहिले ब्याटिङमा सुधार भएको छ । नयाँ प्रतिभाहरू आएका छन् । नेपाल सु्पर ट्यालेन्ट खेलाडीहरू छन्,” पुस १३ गते दोस्रो कार्यकाल सम्हाल्न नेपाल आइपुगेका मुख्य प्रशिक्षक पुबुदुले नेपालको सम्भावनाबारे भने, “ओमान बलियो छ । उनीहरू घरेलु कन्डिसनमा खेल्दैछन् । उनीहरूले पछिल्लो समय राम्रो क्रिकेट खेलिरहेका छन् । आयरल्यान्ड र यूएई पनि रामा छन् । नेपालले दोस्रो पटक विश्वकप खेल्नेमा म पूर्ण रूपमा विश्वस्त छु ।” 

ब्याटिङमा सुधार
नेपाली क्रिकेट टोलीलाई सुरुबाटै बलिङमा राम्रो मानिन्छ । विगत हेर्दा, बलिङ जति बलियो हो, ब्याटिङ त्यति नै कमजोर हो । तर यसपटक नेपाली टोलीको बलिङसँगै ब्याटिङ पनि राम्रो देखिन्छ । अझै ओपनिङ जोडी त नेपालको सदावहार समस्या थियो । कुशल भुर्तेल र आशिफ शेखको आगमनले त्यो समस्या समाधान भएको छ । पछिल्ला खेलमा यी दुई एकनाशको प्रदर्शन गरेका छन् । र राम्रो प्रदर्शन गरेका छन् । अनुभवी प्रदीप ऐरी विकल्पमा छन् ।

“यसपटक हाम्रो ब्याटिङ पक्ष राम्रो छ । जुनसुकै ब्याट्सम्यान लिएर खेल्दा पनि राम्रो हुन्छ भन्ने आत्मविश्वास छ,” कप्तान सन्दीपले भने । 

ओपनिङ जोडीसँगै ज्ञानेन्द्र मल्ल, दीपेन्द्रसिंह ऐरी, शरद भेषाकवर पनि लयमा छन् । नयाँ अनुहार लोकेश बम र विवेक यादवले पछिल्लो समय राम्रो प्रर्दशन गरिरहेका छन् । करण केसी आफैँ पनि ब्याटिङमा भरपर्दा खेलाडी हुन् । कुशल मल्ल पनि छन् ।

“पहिलो नेपाली टोलीलाई बलिङ राम्रो भनिन्थ्यो । अहिले हाम्रो ब्याटिङमा राम्रो भएको छ । एकरूपको प्रदर्शन भएको छ,” अनुभवी अलराउन्डर शरदले भने, “बलिङ त यसै पनि राम्रो छ । सन्तुलित टिम बनेको छ । सबैले राम्रो तयराी गरेर आउछन् । त्यर्सैले त्यही दिन कसले राम्रो खेल्न छ भन्ने हो ।”

नेपालको तयारी 
नेपालले ओमान भ्रमणका लागि पुस १८ गतेबाट बन्द प्रशिक्षण गर्ने भन्दै पुस १५ गते ३० खेलाडीलाई बोलाएको थियो । तर खेलाडी र क्यानबीचको विवादका कारण १८ गते सबै खेलाडी उपस्थित भएनन् ।

क्यानले तत्कालीन कप्तान ज्ञानेन्द्र मल्ल, उपकप्तान दीपेन्द्रसिंह ऐरीसहित सोमपाल कामी र कमलसिंह ऐरीलाई २०२२ को पहिलो ६ महिना सेन्ट्रल कन्ट्रयाक्टमा नराख्ने र ज्ञानेन्द्र र दीपेन्द्रसिंहलाई कप्तान र उपकप्तानको जिम्मेवारीबाट हटाइदिएको थियो । खेलाडीले त्यसको विरोध गरेका थिए । 

निरन्तरको वार्तापछि पुस २० गते खेलाडी र क्यानबीच सहमति जुटेको थियो । त्यसपछि टिमले पूर्ण रूपमा प्रशिक्षण थालेको थियो । झन्डै एक साताको बन्द प्रशिक्षण पछि प्रधानमन्त्री कप खेलाइएको थिया । क्यानले ओमान भ्रमणको तयारी भन्दै राष्ट्रिय खेलकुद परिषद् (राखेप)सँग अनुरोध गरेर प्रधानमन्त्री कपलाई यस वर्ष ट्वान्टी–२० स्वरूपमा खेलाउन अनुरोध गरेको थियो । क्यानको अनुरोधमा राखेप राजी भएको थियो ।

पुस २६ देखि माघ ५ गतेसम्म भएको प्रधानमन्त्री कप राष्ट्रिय क्रिकट प्रतियोगिताको प्रदर्शनका आधारमा क्यानले माघ ६ गते अन्तिम १६ खेलाडीको नाम सार्वजनिक गरेको थियो । बिग बास लिगका लागि अस्ट्रेलिया रहेका सन्दीप माघ ७ गते नेपाल आइपुगेका थिए । 

प्रधानमन्त्री कपपछिको बन्द प्रशिक्षणमा केही खेलाडी कोभिड–१९ संक्रमित भएका थिए । तर अहिले सबै स्वस्थ्य फिट रहेको कप्तान सन्दीपले बताउँछन् ।

“हाम्रो प्रशिक्षण सोचेजस्तै भएको छ । अहिलेसम्म क्वालिटी प्राक्टिस भइरहेको छ । नेपालमा हुने अभ्यास सत्र सकिएको छ । हामी एक राम्रो सम्भावना बोकेर अगाडि बढिरहेका छौँ,” सन्दीपले थपे, “अब ओमानमा प्रतियोगिता अघि तीन ट्वान्टी–२० त्रिकेट खेल्नेछौँ । त्यसले हाम्रो कमजोरी सुधार गर्न अझ मद्दत गर्नेछ ।”

प्रशिक्षक पुबुदुले ओमानमा नेपालका लागि त्यहाँको मौसम चुनौतीपूर्ण रहेको बताएका छन् । उनी थप्छन्, “यहाँको मौसम दिन प्रतिदिन चिसो हुँदै गयो । ओमानमा गर्मी मौसम छ । त्यहाँको कन्डिसन हाम्रो लागि सबैभन्दा ठूलो चुनौती हो ।”

विवेक र लोकेशको आगमन
ओमान भ्रमणका लागि प्रदीप ऐरी, जितेन्द्र मुखियाले पुनरागमन गर्दा विवेक यादव र लोकेश बमले पहिलोपटक राष्ट्रिय टोलीमा स्थान बनाएका छन् । लोकेश 'पावर हिटर' हुन् भने विवेक अलराउन्डर हुन् । ओमान भ्रमणमा दुबैले मौका पाउने सम्भावना बलियो छ ।

क्यानले सुरुमा बोलाएको ३० जनाभित्र लोकेश गरेका थिएनन् । तर प्रधानमन्त्री कपमा गरेको प्रदर्शनका आधरमा पुबुदुले लोकेशलाई सिधै १६ जनाभित्र समावेश गरेका थिए । दुवै जनाले पछिल्लो समय राम्रो प्रदर्शन गरिरहेका छन् । 

“उनीहरू आफ्नै क्षमताले यहाँसम्म आइपुगेका हुन् । विवेक राम्रो अलराउन्डर हुन् । लोकेश पनि राम्रो खेलिरहेका छन्,” नेपालका कप्तान सन्दीपले भने । 

सन्दीपको फरक भूमिका
सन्दीपको कप्तानीमा नेपालले खेल्न लागेको यो पहिलोपटक हो । क्यानले ज्ञानेन्द्र कप्तान र दीपेन्द्रसिंह ऐरीलाई उपकप्तानबाट हटाएर सन्दीपलाई कप्तान नियुक्त गरेको थियो । सन्दीपले यू–१९ टोलीमा कप्तानी गरेका थिए । तर पछि क्यानले सन्दीपलाई हटाएर दीपेन्द्रसिंहलाई कप्तान बनाएको थियो ।

ज्ञानेन्द्र पछिको कप्तान भन्ने बहस चलिरहँदा क्यानले एक्कासी सन्दीपलाई कप्तानको जिम्मेवारी सुम्पिएको थियो । तर सन्दीपले आफू टोलीको नेतृत्व लिन तयार रहेको बताएका छन् ।

“मैले धेरै फरक महशुस गरेको छैन । पहिले म कप्तान नभए पनि एक लिडरको रूपमा थिए । बलिङ डिपार्टमेन्टको मैले नेतृत्व गर्नुपर्ने हुन्थ्यो,” कप्तान सन्दीपले नयाँ भूमिकाबारे भने, “भूमिकाका हिसाबले मेरो रोल नयाँ छ । हामी सबै पछिल्लो ६, ७ वर्षदेखि सँगै खेल्दै आएका छौँ । यसबीचमा मैले सबैसँग नजिक भएर काम गरेको छु । चाहे त्यो फिल्डमा होस् वा अफ द फिल्ड । सबै खेलाडीलाई राम्रो सिनारियो बनाइदिने काम हो । त्यसैले खास फरक पर्छ भन्ने लाग्दैन ।”

के भन्छन् विवेक र लोकेश ?
विवेक यादव : पहिलो पटक राष्ट्रिय टिममा परेको भए पनि मैले ठुलो दबाब महशुस गरेको छैन । सिनियर दाइहरूले हौसला प्रदान गरिरहनुभएको छ । विशेषगरी सन्दीप दाइले मेरो हौसला बढाउनुभएको छ । मैले ६, ७ नम्बरमा ब्याटिङ गरिरहेको छु । पहिलेदेखि त्यही नम्बरमा खेलिरहेको छु ।

मौका पाए भने खेल जिताउने योजनामा छु । आफ्नो रोलमा गएर इनिङ सक्ने मेरो लक्ष्य हुनेछ । टिमलाई विश्वकप पुर्‍याउने नै हाम्रो मुख्य लक्ष्य हो । २०१४ मा विश्वकप खेलेको मलाई थाहा थिएन । पछि थाहा पाएको हुँ । बच्चादेखिको सपना थियो, राष्ट्रिय टोलीमा पर्ने । महत्वपूर्ण प्रतियोगिताका लागि राष्ट्रिय टोलीमा परेको छु । विश्वकप खेल्ने सपना छ । आशा गरौँ त्यो पनि पूरा हुनेछ ।

लोकेश बम : मैले राम्रो गरेर आएको छु । यति ठूलो स्तरमा पहिलोपटक खेल्न जाँदैछु । केही नर्भस पनि छु । तर पनि कसरी राम्रो गर्ने भनेर प्रशिक्षकसँग सल्लाह गरिरहेको छु । मानसिक रूपमा म पूर्ण रूपमा तयार छु । बीचमा १०, १२ दिन अभ्यास गर्न पाइनँ । त्यसले केही असर गर्‍यो  । 

नेपालबाट खेल्ने चाहना सबैको हुन्छ । सिनियर दाइहरूसँग सिक्ने मौका पाएको छु । आगामी दिनमा राम्रो गर्ने मौका छ । मैले जे पनि गरिरहेको थिएँ, राष्ट्रिय टोलीमा पर्नका लागि गरिरहेको थिएँ । त्यो सपना पूरा भएको छ । अब विश्वकप खेल्ने सपना पूरा गर्न चाहन्छु ।

तस्बिरहरू : हरिशजंग क्षेत्री/बाह्रखरी