काठमाडौं । नेकपा (एमाले)का सांसद रघुजी पन्तले चैत १५ गते काठमाडौंको तीनकुनेमा भएको हिंसात्मक प्रदर्शनबारे न्यायिक छानबिन आयोग गठन गर्न नहुने तर्क गरेका छन् । शुक्रबार प्रतिनिधिसभाको राज्य व्यवस्था तथा सुशासन समितिको बैठकमा उनले पूर्वराजा ज्ञानेन्द्र शाहसँग भने बयान लिनुपर्ने तर्क गरे ।

“आपराधिक घटनामा सरकारले न्यायिक आयोग गठन गर्न हुँदैन । शान्तिपूर्ण आन्दोलनमा क्षति भए आयोग गठन हुने हो,” सांसद पन्तको तर्क थियो ।

उनले अगाडि थपे, “श्री ५ भनेर सूचना जारी गर्न लगाउने र गर्नेलाई किन कारबाही नगरेको ? नागरिकको अधिकार ज्ञानेन्द्रलाई छ,” सांसद पन्तले भने, “गाडी ल्याउँदा दुर्गा प्रसाईंलाई किन नपक्रिएको । यस घटनामा ज्ञानेन्द्र शाहको भूमिका भए बयान किन नलिएको ?”

बैठकमा राजावादीको प्रदर्शनका विषयमा जानकारी दिन गृहमन्त्री रमेश लेखक उपस्थित थिए । मन्त्री लेखकले चैत १५ गतेको तीनकुने घटनाको जानकारी दिएपछि सांसदहरूले प्रश्न गरेका थिए ।

“तोडफोड र आगजनी गर्छन् भन्ने कुरा जानकारी थियो । दुईवटा प्रदर्शन एकैदिन गर्न दिनुहुँदैन,” सांसद पन्तले भने ।

चैत १५ गते काठमाडौंको प्रदर्शनीमार्गमा समाजवादी मोर्चा र तीनकुनेमा राजावादीले प्रदर्शन गरेका थिए । समाजवादी मोर्चाको प्रदर्शन शान्तिपूर्ण रहेको थियो । तर, राजावादीको प्रदर्शन हिंसात्मक बनेको थियो । राजावादीको प्रदर्शनका कारण दुईजनाको मृत्यु भएको थियो ।

समितिको बैठकमा बोल्ने क्रममा एमाले सांसद पन्तले राष्ट्रिय प्रजातन्त्र पार्टी (राप्रपा)प्रति कताक्षसमेत गरे । “अर्काे व्यक्तिलाई राजाले पत्याएका छैन । उहाँहरूलाई पत्याएका छैनन् । राजा राजा भन्दै हुनुहुन्छ । उहाँहरूलाई उत्तराधिकार हामी भन्ने छ । राप्रपाको संवैधानिक बाटो पर्खनेमा ज्ञानेन्द्र देखिँदैनन्,” उनले भने ।

सांसद पन्तले चैत १५ गतेको तीनकुने घटना भूतपूर्व राजाको उक्साहटमा भएको 'सफ्ट कू' भएको उनले बताए । उनले यस्ता घटना हुने प्रयत्न नेपथ्यमा जारी रहेको समेत बताए ।