काठमाडौं । काठमाडौं उपत्यकामा मेनपावर व्यवसायी र बिचौलियाहरूले ठगी धन्दादेखि कुटपिटसम्मको काम गरेको पाइएको छ । श्रम, रोजगार तथा सामाजिक सुरक्षा मन्त्रालय र प्रहरी टोली सक्रिय देखिँदा मेनपावरको यस्तो काम बाहिरिएको हो ।

भिजिट भिसामा दुबई पुगेका मोरङको गछियाका फणिन्द्रमणि घिमिरे, सोही ठाउँका प्रेम चौधरी, मोरङकै बेलबारीका ज्ञानेन्द्र चौधरी र सोही ठाउँका गजानन्द चौधरी अलपत्र परेका थिए ।

दुबई पुर्‍याउने आर्यन नामले चिनिने रामकृष्ण मानन्धरले रोजगारीको प्रलोभन देखाएर दुबई पुर्‍याएर अलपत्र पारेका थिए । अलपत्र परेपछि उनीहरू ऋण सापट गरेर नेपाल फर्किएका थिए । रामकृष्णलाई १२ लाख रुपैयाँ बुझाएर उनीहरू दुबई पुगेका थिए । सो रकम असुल गर्न उनीहरूले हारगुहार गरिरहेका छन् । रकम लिने रामकृष्ण आफूहरू नेपाल आएपछि दुबई भाग्न लागेको उनीहरूको भनाइ छ ।

हाल रामकृष्णले पीडित घिमिरेलाई ह्वाट्सएपमा म्यासेज छोड्ने गरेका छन् । फणिन्द्र भन्छन, ‘‘अनलाइनमा देखिँदैन । आक्कलझुक्कल ह्वाट्सएपमा म्यासेज पठाउँछन् । मैले पनि अरूलाई रुपैयाँ दिएको छु, पाएपछि दिन्छु भन्दै टारिरहेका छन् । लुकीछिपी बसेका छन् ।”

हाल दुबई बस्दै आएका मोरङको मधुमल्लाका राजन कार्कीको ‘सेटिङ’मा उनीहरू दुबई पुगेका थिए । उनीहरूलाई दुबईमा केही महिना बसाएर माल्टामा काम गर्न पठाइदिने आश्वासन दिइएको थियो ।

यसबारे नेपाल प्रहरीको मानव बेचबिखन अनुसन्धान शाखाले उनीहरूलाई सम्पर्क गरेर जानकारी लिएको थियो । तर, अहिलेसम्म उनीहरूको रकम फिर्ता भएको छैन ।

यता, मंगलबार काठमाडौंको टोखा नगरपालिका–१४ स्थित हरि गुरुङले सञ्चालन गरेको ट्रिपल स्टार मेनपावरमा वैदेशिक रोजगारीको विषयलाई लिएर मेनपावर सञ्चालकहरूले युट्युबर र केही व्यक्तिहरूलाई निर्घात कुटपिट गरे ।

त्यसक्रममा तीनजना घाइते भएको महानगरीय प्रहरी परिसर काठमाडौंका एसपी दिनेश मैनालीले जानकारी दिए । वैदेशिक रोजगारीमा पठाउने भन्दै ठगी गरेको विषयमा विवाद हुँदा मेनपावर सञ्चालकहरूले युट्युबरमाथि हातपात गरेको एसपी मैनालीले बताए ।

मेचिङ नेपाल च्यानलमा कार्यरत ३४ वर्षीय दिपेशराज पाण्डे, ४२ वर्षीय हरिप्रसाद पाठक र ३५ वर्षीय दशरथ भण्डारी घाइते भएका हुन् । उनीहरू तीनैजनाको ग्रीनसिटी अस्पतालमा उपचार भइरहेको छ । प्रहरीका अनुसार घाइतेहरूको अवस्था सामान्य छ ।

घटनाबारे प्रहरी वृत्त महाराजगन्जबाट अनुसन्धान भइरहेको एसपी मैनालीले जानकारी दिए ।

यस्तै, वैदेशिक रोजगारीको पलोभन देखाउँदै विदेश पुर्‍याएर अलपत्र परेका करिब हजारभन्दा बढी नेपालीले श्रम मन्त्रालयमा आफ्ना गुनासाहरू टिपाएका छन् ।

भिजिट भिसामा दुई लाखदेखि १० लाख रुपैयाँसम्म बुझाएर विदेश गई अलपत्र परेका अधिकांश नेपालीहरूले गुनासो टिपाइरहेका छन् ।

कारबाही

मन्त्रालयले सोमबार सिनामंगलस्थित मिनुवा मेनपावर कम्पनीलाई कारबाहीको दायरामा ल्याएको थियो । सो मेनपावरले विगतका दिनहरूमा तोकिएको भन्दा बढी रकम असुल्दै आएको बताइएको छ ।

‘‘हामीलाई मेनपावरले बढी रुपैयाँ असुल्दै आएको गोप्य सूचना आएको थियो । सोही सूचनाका आधारमा निगरानी राख्यौँ । सोमबार मेनपावर सञ्चालकलाई नियन्त्रणमा लियौँ,” मन्त्रालयका प्रशासन शाखा अधिकृत विष्णु लामिछानले भने ।

मेनपावर सञ्चालकलाई ठगी गरेको रकम फिर्ता गराउने गरी अनुसन्धान अगाडि बढाइएको लामिछानेले बताए । ‘‘यस्तै किसिमका धेरै गोप्य सूचना आएका छन् । हामीले ठाउँको ठाउँ कारबाही गर्ने उद्देश्यले मार्सल टिम गठन गरेका छौँ,” उनले भने ।

दैनिकजसो मन्त्रालयमा मेनपावर कम्पनीहरू र व्यक्तिहरूले लाखौँ रकम ठगी गरेको र विदेशमा अलपत्र पारेका घटनाहरू बढ्दै गएको अवस्थामा यसलाई रोक्न मन्त्रालय अघि बढेको जनाइएको छ । श्रम मन्त्रालयको पहलमा अहिलेसम्म २८ जनाभन्दा बढी अलपत्र परेका व्यक्तिहरूको उद्धार भइसकेको छ ।