काठमाडौं । नेपाल चेम्बर अफ कमर्सले भौतिक पूर्वाधार र निर्यात प्रर्वद्धन गर्न सकिने खालका उद्योगमा लगानी गर्न जर्मनीसँग आग्रह गरेको छ । नेपालका लागि जर्मनीका राजदूत डा. थोमस प्रिन्जसंगको भेटमा अध्यक्ष राजेन्द्र मल्लले जलविद्युत, पर्यटन, निर्यातमुलक उद्योगमा लगानी तथा सहकार्य गर्न आग्रह गरेका हुन् । जलाशाययुक्त जलविद्युत आयोजनामा लगानीको सम्भावना रहेकाले जर्मनीका निजी क्षेत्रलाई अध्ययन भ्रमणका लागि बोलाउन उनले राजदुत प्रिन्जसँग आग्रह गरे ।

यस्तै पर्यटन क्षेत्रमा युरोपेली मुलुकलाई आकर्षित गर्न नेपालले विभिन्न अभियान चलाईरहेकाले काठमाडौं फ्र्याङफर्ट सिधा उडान खुलाउनका लागि पहल गर्न पनि उनले आग्रह गरे ।  "काठमाडौंबाट फ्र्याङर्फटबीचको हवाई उडान जम्मा आठ घण्टा ४५ मिनेट मात्रै छ । जर्मनीले थोरै सहजीकरण गरिदियो भने युरोपबाट धेरै पर्यटक नेपालले भित्र्याउन सक्छ । कोरोना संक्रमणअघि वार्षिक ३६ हजार हाराहारीमा जर्मनीबाट पर्यटक नेपाल आएका छन्  सिधा हवाई उडान हुन सक्यो भने युरोपका अन्य देशबाट पनि पर्यटकलाई आर्कषित गर्न सकिन्छ," उनले भने ।

यूरोपियन यूनियनले नेपाललाई सेफ्टी लिस्टमा राखेको विषयमा अध्यक्ष मल्लले नेपाल नागरिक उड्डयन प्राधिकरणलाई सेवा मुलक र नियमन छुट्टाछुट्टै बनाउने गरी विधेयक अगाडि बढाएको जानकारी गराउँदै नेपाललाई सेफ्टी लिस्टबाट हटाउने विषयमा प्रक्रिया अगाडि बढाइदिन पहलका लागि आग्रह पनि गरे ।

यस्तै कफि, पस्मिना, जडीबुटीजन्य तेल, हस्तकलाका सामानहरुको जर्मनी लगायतका युरोपेली देशमा माग रहेकाले व्यापार सहजीकरण गरिदिन पनि उनले आग्रह गरे ।

चेम्बर पदाधिकारीसँगको भेटमा राजदूत प्रिन्जले पनि कोभिड लगत्तै विश्वमै पर्यटन गतिविधि बढ्ने भएकाले त्यसको अवसर खोज्न तर्फ नेपाल लाग्नुपर्ने बताए । काठमाडौं फ्र्याङफर्ट सिधा हवाई उडानका लागि नेपालले हवाई सुरक्षाको मापदण्ड पूरा गर्नुपर्ने उनले बताए ।