काठमाडौं । मोहम्मद सालाहको गोलमा इजिप्टले शनिबार राति अफ्रिकन कप अफ नेसन्समा पहिलो जित दर्ता गरेको छ । पहिलो जित दर्ता गर्नेक्रममा इजिप्टले गिनी–बिसाउलाई १–० ले हराएको हो । 

समूह ‘डी’ मा इजिप्टको यो पहिलो जित हो । इजिप्टको जितमा लिभरपुलका फरवार्ड सालाहले ६९औं मिनेटमा गरेको गोल निर्णायक सावित भयो । यसअघि इजिप्ट पहिलो खेलमा नाइजेरियासँग १–० ले पराजित भएको थियो । 

शनिबार राति नै सम्पन्न अर्को खेलमा नाइजेरियाले सुडानलाई ३–१ ले हरायो । नाइजेरियाको जितमा सामुयल चुकवेज, ताइवो अओनियी र मोसेस सिमोनले गोल गरे । सुडानका लागि विलिलदिन खेदिरले गरेको गोल सान्त्वना बन्यो । 

समूह ‘डी’ मा नाइजेरिया ६ अंकका साथ शीर्ष स्थानमा छ भने इजिप्ट तीन अंकका साथ दोस्रो स्थानमा छ । समान एक अंक जोडेको गिनी–बिसाउ र सुडान क्रमशः तेस्रो र चौथो स्थानमा छन् । 

समूह ‘सी’ मा घाना र गाबोनले १–१ को बराबरी खेले । समूह ‘सी’ मा मोरोक्को ६ अंकका साथ शीर्ष स्थानमा हुँदा गाबोन ४ अंकका साथ दोस्रो स्थानमा छ । घानाले एक अंक जोडेको छ ।