काठमाडौं । आर्थिक वर्ष २०७२/७३ मा देशभर भएको १० हजार १३ सवारी दुर्घटनामा २ हजार ६ जनाको मृत्यु भएको छ ।

ट्राफिक प्रहरीको तथ्यांक अनुसार अघिल्ला वर्षभन्दा सवारी दुर्घटना झनै बढेको छ । प्रहरीको तथ्यांक अनुसार आर्थिक वर्ष ०७०/०७१ मा देशभर ८ हजार ४ सय ६ सवारीसाधन दुर्घटनामा परेका छन् । ८ हजार ४ सय ६ सवारीसाधन दुर्घटनामा  १ हजार ७ सय ८७ जनाको मृत्यु भएको छ । 

त्यसैगरी ०७१/०७२ मा ९ हजार १ सय ४६ सवारी साधन दुर्घटनामा परेका छन् । दुर्घटनामा २ हजार ४ जनाको मृत्यु भएको ट्राफिक प्रहरीको तथ्यांकमा उल्लेख छ ।

त्यस्तै गएको वर्षमा १० हजार १३ सवारी दुर्घटना भएका छन्, जसमा परि २ हजार ६ जनको मृत्यु भएको छ । 

प्रहरीका अनुसार मंगलबार र बुधबार मात्रै देशभर भएको सडक दुर्घटनामा ४५ जना भन्दा बढीको ज्यान गएको छ । 

महानगरीय ट्राफिक प्रमुख डीआईजी प्रकाश अर्यालका अनुसार सवारी दुर्घटना यसरी बढ्नुको प्रमुख कारण चालकको लापरवाही नै हो । अर्यालले सवारी दुर्घटना बढ्नुका ७ कारण यसरी खुलाए । 

१. चालकको लापरवाही– सडकको अवस्था नहेरी आफूखुसी सडकमा सवारी गुडाउने बानी परेका चालकका कारण सडक दुर्घटना हुने गरेका छन् । 

२.लाइसेन्सविना चलाउनु– सवारी चालक अनुमतिपत्र (लाइसेन्स) विना सवारी चलाउनु र साना सवारी चालक अनुमतिपत्रले ठूला तथा मझौला सवारी साधन चलाउनाले पनि सडक दुर्घटना बढेको छ ।

३.यात्रु खचाखच राख्नु– यात्रुले खचाखच भरिएको सवारी साधन चलाउनाले पनि बढी दुर्घटना हुने गरेका छन् ।

४.मापसे गरि सवारी चलाउनु–मदिरा सेवन गरी सवारी चलाउने बानी चालकमा अझै हटेको छैन । मदिराको जोसमा आएर सडकको अवस्था नहेरी सडकमा जवरजस्ती सवारी चलाउने गरेका कारण सडक दुर्घटना बढेका छन् ।

५.सडक र सवारी साधनको अवस्था नहेर्नु– चालकले सडक र सवारी साधनको अवस्था नहेरी सडकमा तीव्र गतिमा सवारी चलाउने गर्छन् । चालकले अस्वस्थ प्रतिष्पर्धा गर्नु पनि अर्को सवारी दुर्घटनाको कारण हो । 

६.यातायात क्षेत्रको सिन्डिकेट– यातायात क्षेत्रमा हुने गरेको सिन्डिकेट अन्त्य नभएसम्म सडक दुर्घटना कम हुँदैन । मागअनुसार सवारी साधन नराख्ने र छतमा पनि यात्रु राखेर चलाउँदा बढी दुर्घटना हुने गरेका छन् ।

७.पुराना सवारी साधन हटाउन नसक्नु– पुराना सवारी साधन, सडकको साइजभन्दा ठूला सवारी साधन चल्नु,जाँचपास प्रक्रिया ठिक नहुनु, सडक इजाजत वितरण प्रणाली ठिक नहुनु पनि प्रमुख कारण हुन् ।