काठमाडौं । काठमाडौंका सडकमा ‘स्मार्ट स्ट्रिट लाइट’ योजनाअन्तर्गतको काममा ढिलासुस्ती भएको छ । नेपाल विद्युत् प्राधिकरणले स्मार्ट स्ट्रिट लाइट जडान योजना टेन्डर प्रक्रियामा गइसकेको जनाए पनि काम सुरु भएको छैन ।

गत वर्ष कात्तिकमै उक्त बत्ती राखिसक्नुपर्ने सम्झौता भए पनि दुईथरीका योजनाको ‘कन्सेप्ट’का समयमै काम गर्न नसकिएको प्राधिकरणले जनाएको छ । प्राधिकरणका प्रवक्ता सुरेशबहादुर भट्टराईका अनुसार पहिले सोलारबाट स्ट्रिट लाइट जडान गर्ने कन्सेप्ट थियो ।

‘‘प्राधिकरणको सोलार स्ट्रिट कन्सेप्टको काम अघि बढाउन नसकिने भएपछि नगरपालिकासँग सम्झौता गरेर स्मार्ट स्ट्रिट लाइटको काम अघि बढाउने भनेका थियौँ,” उनले भने ।

काठमाडौंको रात्रिकालिन सडक सौन्दर्य तथा सवारी आवागमनको सहजताका लागि काठमाडौं महानगरपालिका र प्राधिकरणबीच सम्झौता भएको थियो । महानगरपालिकाका अनुसार महानगर र प्राधिकरणको बजेटमा प्राधिकरणले स्मार्ट बत्ती जडान गर्नुपर्ने हो ।

महानगरका सहरी पूर्वाधार विकास विभागका प्रमुख रामबहादुर थापाले बत्ती जडान गर्न महानगरले गत वर्ष १३ करोड रुपैयाँ छुट्ट्याएको जानकारी दिए । ‘‘प्राधिकरण र महानगरको सम्झौता मुताबिक महानगरले १३ करोड बजेट छुट्ट्याएको थियो । अब यो बजेट प्राधिकरणले काम अगाडि बढाए खर्च हुन्छ । अन्य क्षेत्रमा खर्च भएको छैन,” प्रमुख थापाले भने ।

काठमाडौं र भक्तपुरका सडकमा स्मार्ट स्ट्रिट लाइट जडान गर्न निर्माण व्यवसायी छान्ने प्रक्रिया अघि बढेको प्राधिकरणले जनाएको छ । ‘‘लगभग काम सुरु गर्ने अवस्थामा पुग्न लागेका छौँ । योजनाको नीति–नियमानुसार काम अगाडि बढाउनुपर्ने भएकाले समय लागेको हो । ढिलो भएको छैन,” प्रवक्ता भट्टराईले भने ।

सम्झौताबमोजिम प्राधिकरणले ०७७ कात्तिकमै सडकमा स्मार्ट स्ट्रिट लाइट राखिसक्नुपर्ने थियो । काठमाडौंका सडकमा करिब पाँच हजार पोलहरू छन् । ती पोलहरूमा राखिएका पुराना बत्तीहरू केही बिग्रिएका छन् भने केही मधुरो बल्छन् । सोही कुरालाई ध्यानमा राख्दै अत्याधुनिक विद्युतीय सडक बत्ती राखिने योजना अघि सारिएको थियो ।

प्राधिकरणले १७ हजार सडक बत्ती जडान गर्ने योजनाअन्तर्गत ललितपुरमा काम सुरु गरेको जनाएको छ । ललितपुरका केही सडकमा स्मार्ट स्ट्रिल लाइट बलिसकेका छन् ।

प्राधिकरणका प्रवक्ता भट्टराईका अनुसार काठमाडौंका सडकमा अब राख्न लागिएको बत्ती सोलारबाट पनि बाल्न सकिन्छ । ‘‘यी लाइट विद्युत्बाट मात्रै नभई सोलारबाट पनि बाल्न सकिन्छ । यो लाइट रातिमा आफैँ बल्ने र उज्यालोमा आफैँ निभ्छ । काठमाडौं उपत्यकामा यो लाइट जडान गरी प्राधिकरणको लाइन जडान गरी प्रयोग गरिनेछ,” उनले भने ।

लाइट अन अफ गर्ने सर्भर प्राधिकरणसँग जोडिने भएकाले प्राधिकरणबाटै अन अफ गर्न सकिने जनाइएको छ । प्राधिकरणले कम समय र थोरै जनशक्तिको प्रयोगमा लाइट जोड्ने काम भइरहेको जनाएको छ । काठमाडौंं महानगरपालिकाको हकमा निर्माण व्यवसायी छनोटकार्य अन्तिम चरणमा पुगेको प्राधिकरणले जनाएको छ ।

एकपटक जडान गरेको लाइट करिब १२ वर्षसम्म टिक्ने प्राधिकरणले जनाएको छ ।

प्राधिकरणले उपत्यकामा लाइट जडान गरिसकेपछि अरू विभिन्न सहरहरूमा पनि नगरपालिकाको सहकार्यमा स्मार्ट स्ट्रिल लाइट जडान योजना अगाडि बढाउने जनाएको छ ।