काठमाडौं । यही कात्तिक ८ गते बिहान अत्यधिक सवारी चाप हुने काठमाडौंको मुख्य सडक नयाँ बानेश्वरमा एक्कासि बीच सडकमा खाल्डो पर्‍यो । सिभिल अस्पताल र यातायात व्यवस्था विभागबीचको सडकमा ठूलो खाल्डो परेको चार दिनसम्म पनि पुरिएको छैन । उक्त सडक भएर आउजाउ गर्नेहरू सास्ती खेप्न बाध्य छन् ।

सो दिन सानो खाल्डो परेसँगै महानगरीय ट्राफिक प्रहरी महाशाखाले सडक विभागलाई खबर गरेको थियो । एक्साभेटरले कोतरेर ठूलो बनाइएको खाल्डोलाई अहिले डिभाइडर कोमले घेरबार गरी राखिएको छ ।

ट्राफिकले खबर गरेपछि सडक विभागले एक्साभेटर लिएर गई कोतरेको थियो । सानो खाल्डो कोतर्दै जाँदा ठूलो बन्यो । खाल्डो ठूलो हुँदा एकतर्फी लेन नै बन्द भएको छ ।

सडक विभागका महानिर्देशक अर्जुनजंग थापा ढल निकास समितिले ढलको काम सकाएर विभागलाई हस्तान्तरण गरे दुर्ई दिनमा सडक पिच हुने बताउँछन् । ‘‘खाल्डो परेको तलपट्टि ढल बढिरहेको छ । पहिला ढलको काम नसकाई सडक पिच गर्ने कुरा भएन । ढल बनाउने जिम्मा काठमाडौं उपत्यका खानेपानी लिमिटेड (केयूकेएल)अन्तर्गतको ढल निकास विभागलाई दिइएको छ । ढल निकासले ढलको काम सकाएर सडक विभागलाई हस्तान्तरण गरेपछि मात्रै सडक पिच गर्न सकिनेछ,” महानिर्देशक थापाले भने ।

ढलको मंगालमा समस्या देखिएको र उक्त काम सकाउन चार दिनसम्म लाग्ने केयूकेएलले जनाएको छ । ढल बगिरहेको मंगालमा समस्या देखिएको केयूकेएलका प्रवक्ता प्रकाशकुमार राईले जानकारी दिए ।

‘‘सडकमुनि ढल बगिरहेको थियो । ढलको पानीले त्यहाँको माटो बगाएर लिएको देखिन्छ । अब मंगालको मर्मत–सम्भार राम्रोसँग गर्नुपर्ने हुन्छ । अहिले केयूकेएलअन्तर्गतको ढल निकास समितिको टोलीले ढलको काम गरिरहेको छ,” प्रवक्ता राईले भने ।

ढलकै समस्याका कारण सडकमा ठूलो खाल्डो परेको ट्राफिक इन्जिनियर आशिष गजुरेलले बताए । ‘‘एक्कासि यत्रो ठूलो खाल्डो परेछ । सडकमुनि ढल बगिरहेको थियो । पहिले ढल निकास व्यवस्थापनको काम सकाएर कच्ची रूपमा खाल्डो पुरियो । ढलको मंगाल पनि जीर्ण बन्दै गयो र बगिरहेको पानीले त्यहाँको खुकुलो माटोलाई बगाएर लग्यो । उक्त क्षेत्रमा कंक्रिटका अधिकांश संरचनाहरू रहँदा जमिनले पानी सोस्न पनि सकेन । यसैले खाल्डो परेको हो,” गजुरेलले भने ।

ढल निकासको काम गर्ने बेला नै पक्की तरिकाले गरेको यस्तो खालको समस्या निम्तिने सम्भावना नहुने गजुरेलको भनाइ छ । ढल निकास विभाग वा सम्बन्धित निकायले बेलाबेलामा यस्ता सडकखण्डको बीचमा रहेका ढलहरूको मर्मत–सम्भार गरिरहनुपर्ने गजुरेल बताउँछन् ।

केयूकेएलअन्तर्गतको ढल निकास समितिले पहिले कसले ढल निकासको काम गरेका भनी पत्ता लगाउन नसकिएको जनाएको छ । ‘‘कसले के आधारमा पहिले ढल निकासको काम गरेको थियो भन्ने खुलेको छैन । कहिले मंगाल बनाएर ढल निकास व्यवस्थापन गरिएको पनि खुलेको छैन । खुलेको भए मर्मत–सम्भार गर्न सहज हुन्थ्यो । यद्यपि, हामीले आफ्नो हिसाबले मर्मत–सम्भार गरिरहेका छौँ,” केयूकेएलका प्रवक्ता राईले भने ।

ढलको चाप मंगालमा बढ्दै जाँदा मंगाल जीर्ण भएर सडकमा खाल्डो परेको केयूकेएलको भनाइ छ । अब केयूकेएलले ढल बग्ने मंगालको काम सकाएपछि विभागले सडक पिच गर्ने जनाइएको छ । केयूकेएलले अब ढलको मंगाल मर्मत–सम्भार गरेर तथ्यांक राखिने जनाएको छ ।