काठमाडौं । हिमाली जिल्ला हुम्लाका चार गाउँमा भारी हिमपात भएको छ । चीनसँग जोडिएको हिल्सा नारा लेक, लिमी यारी र मुचुमा हिउँ पर्दा जनजीवन अस्तव्यस्त बनेको छ ।

तीनदिनदेखिको अविरल वर्षाका कारण भित्र्याउन ठिक्क पारेको बाली बाढीपहिरोले बगाएर लगेको छ । यहाँका किसानहरूले भित्र्याउन लागेको धान, कोदो, मकै, फापर, कागुनोलगायतको अन्न बाढीले बगाएको छ । पानी परेका क्षेत्रहरूमा अन्नबाली बाढीले बगाएको छ भने अन्य ठाउँमा हिउँले पुरिदिएको छ । 

आज विहान राया, थाली, प्युस, कारंगा, लाली, गोप्का, लगायतका पहिरो जाँदा भित्र्याउन ठिक्क पारेको बाली बाढीले बगाएको स्थानीय कल्पना बुढाले बताइन् । ‘‘घरभित्र क्षति पुगेको छैन । पाकेको बाली बाढीले बगाउँदा कृषकहरू चिन्तित भएका छन,” उनले भने ।

जिल्ला प्रशासन कार्यालय हुम्लाका प्रमुख जिल्ला अधिकारी गणेश आचार्यले सोमबारदेखि हिल्सानाकामा हिमपात भएको जानकारी दिए । आइतबारदेखि निरन्तर पानी परिरहेको र सोमबारदेखि हिल्सा नाका क्षेत्रमा विभिन्न गाउँमा हिमपात भएको उनले बताए । उनकाअनुसार हवाई सेवा आइतबारदेखि नै अवरुद्ध छ । 

“सिमिकोट विमानस्थलमा भने निरन्तर पानी परिरहेको छ । बेलुकासम्म हिउँ पर्न सक्छ । हिल्साको नारा लेकमा सोमबार नै १ फिट हिउँ जमिसेको खबर आएको थियो । अहिले त्यहाँ जान सकिने अवस्था छैन । प्रशासनका केही कर्मचारीहरू पनि हिल्सा नारालेकमै थुनिएका छन् । यातायात सेवा पनि अवरुद्ध भएका छन्,” उनले भने ।

प्रशासनकाअनुसार हिल्सा नाकामा सशस्त्र प्रहरी सीमा सुरक्षा चौकी, नेपाल प्रहरीको सुरक्षा चौकी, हिल्साका होटेल व्यवसायी रहँदै आएका छन् र उनीहरू नै बढी प्रभावित बनेका छन् । पाँच हजार मिटर अग्लो हुम्ला हिल्सा नारा लेकमा निरन्तर हिमपात भइरहेकाले पूरै नाका अहिले बन्द रहेको प्रशासनले जनाएको छ । 

प्रहरी कार्यालय हुम्लाका प्रहरी जवान नवीन जोशीकाअनुसार ३१ गते बिहानदेखि हिमपात भएको हो । हुम्लाका हिमाली गाउँ लिमी, यारी, हिल्सा र मुचुमा हिमपात हुँदा सबै बाटाघाटा अवरुद्ध भएको उनले बताए । 

“मानिसहरू बाहिर निस्कने अवस्था छैन । चीनदेखि हुम्ला सदरमुकामसम्म चल्ने सवारीसाधनहरू पूर्णरुपमा ठप्प भएका छन् । हिजोसम्म खार्पुनाथ गाउँपालिका र यांचुकुनासम्म मात्रै गाडी चलेका थिए । आजदेखि सवारी पनि नचल्ने अवस्था आएको छ,” उनले भने, “लिमीको प्रहरी कार्यालय हिउँले पुरियो भन्ने खबर आएको छैन । गएरातिसम्मको अपडेटअनुसार हिल्सामा एक फिट हिँउ परेको थियो । आज सम्पर्क भएको छैन । पुस माघ महिनामा पर्ने हिउँ कात्तिकमै पर्दा यहाँको जनजीवन अस्तव्यस्त बनेको छ ।” 

जिल्ला प्रहरी कार्यालय हुम्लाकाअनुसार हिमपात भएका क्षेत्रमा मानिसहरू सम्पर्कमा आएका छैनन् । प्रहरी जवान जोशीले निरन्तर हिमपात हुँदा मोबाइलमा चार्ज सकिएर सम्पर्कविहीन हुनसक्ने बताए । 

‘‘हिउँ परिरहेको ठाउँमा बत्ती छैन । निरन्तर तीन दिनदेखि वर्षा भइरहेको छ । घाम नलाग्दा सोलार चार्ज भएका छैनन । त्यसैले सम्पर्क हुन नसकेको हो,” जोशीले भने ।

प्रशासनकाअनुसार नेपाल टेलिकमको टावर नबन्दा सञ्चार सम्पर्क गर्न सकिने अवस्था छैन । निरन्तर तीन दिनदेखि पानी पर्दा र हिमपात हुँदा सोलारले काम गरिरहेका छैनन् । जसले गर्दा वल्डलिङ्क सेवा पनि अवरुद्ध छ । अधिकांश क्षेत्रको बत्ती गएको उनले बताए ।

प्रशासनका अनुसार अहिले पनि निरन्तर पानी परिरहेकै छ ।