काठमाडौं । यसपालिको दसैँमा संघीय राजधानी काठमाडौं उपत्यकाबाट करिब ९ लाख मानिस बाहिरिए । तर, उनीहरूमध्ये अधिकांशले काठमाडौंकै छेउ (नौबिसे–नागढुङ्गा) मा ३ घण्टाभन्दा बढी सवारी जाममा बस्नुपर्यो ।

अहिले पनि नौबिसे–नागढुङ्गा क्षेत्रमा काठमाडौं भित्रिने सवारीहरूको भिड देख्न सकिन्छ । घण्टौंको जाम बेहोरेर दसैँ मनाउन घर गएकाहरूले फर्किँदा पनि उही समस्या भोगिरहेका छन् । यात्रुले करिब २० किलोमिटर दूरी छिचोल्न तीन घण्टाभन्दा बढी सवारी जामको सामना गरिरहेका छन् ।

नौबिसेको खानीखोला, झ्याप्लेखोला, नागढुङ्गा हुँदै काठमाडौं कलंकीसम्मको २० किलोमिटर दूरीमा हुने सवारी जामको हैरानी नयाँ भने होइन । दसकौँदेखि यो क्षेत्रमा यात्रुले ३ घण्टादेखि १२ घण्टासम्म जामको हैरानी खेप्दै आएका छन् । 

कालिकोटका नन्दबहादुर नेपाली आइतबार नेपालगञ्जबाट काठमाडौं फर्किए । उनी नेपालगञ्जबाट नौबिसे पुग्दासम्म जाममा परेनन् । जब गाडी नौबिसे पुग्यो, त्यसपछि सुरु भयो काठमाडौंको जाम ।  

‘‘गाउँ जाने बेलामा नौबिसे–नागढुङ्गाको जाम छिचोल्नै तीनघण्टा बढी लाग्यो । अहिले गाउँबाट काठमाडौं फर्किँदा पनि उस्तै रहेछ । नेपालगञ्जबाट बिहान ९ बजे नौबिसे पुगिसकेका थियौँ । नौबिसेमा अत्यधिक जाम रहेछ । कलंकी पुगिसक्दा पनि जाम सकिएन । त्यति छोटो बाटोमा तीन घण्टा बढी लाग्यो,” नेपालीले भने, ‘‘बेलुकी ५ बजे काठमाडौंबाट हिडेको रातिको ८ बजेपछि मात्रै नौबिसे कट्यो । अहिले काठमाडौं आउँदा पनि १२ बजे मात्रै कलंकी नागढुङ्गा कट्यो ।”

हाल दैनिक गाउँबाट काठमाडौं फर्किनेहरूको संख्या बढ्दैछ । अब यो नाकाको जाम झनै बढ्दै जाने निश्चित छ ।

यो नाकामा गाउँ आउजाउ गर्ने सवारी साधन, ढुवानीका टिपर, दुई पाङ्ग्रे सवारी साधनहरू पनि उत्तिकै गुड्छन् । सवारी जाममा अत्यावश्यक सेवाका एम्बुलेन्स, सुरक्षा निकायका गाडी, स्कुल बस छिर्ने ठाउँसमेत हुँदैन । यही नौबिसे–नागढुङ्गाको जामकै कारण उपत्यकामा आउजाउ गर्ने सबै किसिमका सार्वजनिक सवारी साधन समयमै गन्तव्यस्थल पुग्न सकिरहेका छैनन् ।

२०७६ साल असोज १० नौबिसे–नागढुङ्गा सडकखण्डको जाममा फसेर मिर्गौला रोगी रोतहट गौर नगरपालिका ७ का ३५ वर्षीय रूपलाल साहले गाडीभित्रै प्राण त्यागेका थिए ।  उपचारका क्रममा काठमाडौं ल्याउँदै गर्दा बसभित्रै उनको मृत्यु भएको थियो । 

महानगरीय ट्राफिक प्रहरी महाशाखाले नौबिसे–नागढुङ्गाको सवारी व्यवस्थापन गर्न र जाम कम गर्न विशेष प्रहरी टोली खटाइएको जनाएको छ । महाशाखाका प्रवक्ता एसपी सञ्जीव दास शर्माले नौबिसे–नागढुङ्गाको जाम घटाउन ३० जनाको ट्राफिक टोली खटाइएको जानकारी दिए । 

‘‘अहिले दैनिक ३८ हजार यात्रु उपत्यका भित्रिरहेका छन् । यो संख्या सामान्य हो । यो नाकाबाट ७८ हजारको हाराहारीमा यात्रु भित्रिने गर्छन् । अहिले खासै समस्या छैन । त्यहाँ खटाइएका ट्राफिक प्रहरीहरूले सहजै सडक सवारी व्यवस्थापन  र जाम व्यवस्थापन गर्न सकिरहेका छन्,” प्रवक्ता दासले भने, ‘‘दसैँ मनाएपछि जम्मा पाँच हजार गाडी उपत्यका भित्रिएका छन् । पूर्णीमाको भोलिपल्टदेखि मात्रै भित्रिने क्रम बढ्दै जाने हो । अहिलेको अवस्थामा उपत्यका बाहिरिनेको संख्या शून्य जस्तै छ । नौबिसे–नागढुगांमा सवारी जाम हुनलाई ४० हजार सवारी आवागमन हुनुपर्छ ।”

सडक डिभिजन कार्यालयले पनि अहिले नौबिसे–नागढुङ्गा सडकखण्डमा समस्या नभएको जनाएको छ । डिभिजन कार्यालयका प्रमुख कुवेर नेपाली नौबिसे–नागढुङ्गामा पहिलेभन्दा अहिले जाम धेरै कम भएको बताउँछन् । 

‘‘पहिले सडक साँघुरा थिए । जीर्ण थिए । खाल्डैखाल्डा थिए । अहिले त्यो अवस्था छैन । सबै मर्मत सम्भार गरिसकेका छौँ । साँघुरा मोडहरू कटिङ गरी सडक चौडा बनाइएका छन् । सबै जाम एकैपटक हट्ने होइन । विस्तारै विस्तारै हट्दै जाने हो । पहिलेभन्दा अहिले सवारी आवागमन धेरै सहज भएको छ,” नेपालीले भने ।