काठमाडौं । “तपाईंको कोर्ने शैली तपाईंले संसारलाई कसरी हेर्नुहुन्छ भन्ने कुराको प्रतिबिम्ब हो । तपाईंले यसलाई कैद गर्दै हुनु हुन्न, बल्की व्याख्या गर्दै हुनुहुन्छ ।” अमेरिकाका चर्चित चित्रकार, लेखक तथा कला गुरु जुलियट एरिस्टिडसको यो भनाईले कुनै पनि कलाकारले क्यानभासमा रङ र कुचीमार्फत आफूले देखेका, सुनेका कुुराहरूलाई चित्रमार्फत व्याख्या गर्ने गर्छन् भन्ने कुरा प्रस्ट्याउन खोजेको छ । अर्थात्, चित्रकारले आफ्नो कुचीमार्फत आफ्नो वरिपरिको समाजलाई क्यानभासमा उतार्ने प्रयास गर्छन् ।

विगत तीन दशकदेखि चित्रकलामा रमाइरहेकी कलाकार संगी श्रेष्ठको कलामा पनि समाजको प्रतिबिम्ब झल्किन्छ । संगी समाज र आफ्ना वरिपरिका परिवार, आफन्त, साथीभाइ र सहकर्मीहरूको सुख, दुःख, भोगाइ, गुनासो सुनेर त्यसलाई क्यानभासमा उतार्ने प्रयास गर्छिन् । समाजलाई क्यानभासमा उतार्ने मात्रै नभई आफ्नो कलामार्फत ‘रे अफ होप’ अर्थात् आशाको किरण र सकारात्मकता पनि फैलाउने प्रयास गर्छिन् ।

समाजलाई कोर्ने प्रयासमा उनले दुई वर्षदेखि पूरा विश्वलाई आक्रान्त बनाइरहेको कोरोना महामारी र त्यसले निम्त्याएको त्रास, कोलाहल र निराशालाई पनि क्यानभासमा उतारेकी छन् । उनले कोरोना महामारीको समयमा कोरेका एक दर्जनभन्दा बढी सिर्जनालाई ‘संवेग’ शीर्षकमा ग्यालरी एमक्युबमा प्रदर्शनीमा राखिएको छ ।

“कोरोनाका कारण कति बेरोजगार बने । आफ्नै नजिकका कतिलाई कोरोना संक्रमण भयो भने कतिको निधन भयो अनि कति बेरोजगार बने । उनीहरूको निराशा र हतासलाई सुनिरहँदा मलाई सकारात्मकता र आशा फैलाउन आफ्नो तवरबाट केही गर्नुपर्छ जस्तो लाग्यो र म कर्ममा निरन्तर लागिरहेँ,” उनले भनिन् ।

उनले आफ्ना चित्रहरूलाई आशा विश्वासको, आशा खुसीको, आशा शान्तिको, आशा जितको भन्दै आशा शब्दलाई प्राथमिकता दिएर शीर्षकहरू राखेकी छिन् ।

संगीको हरेक कलामा एउटा अनुहार हुन्छ, तर हामीले देखिरहेका भन्दा बिलकुलै भिन्न अनुहार । फरक आयतकार ज्यामितीय आकृतिमा आँखा, मुख र नाक राखेर समाजका हरेक मानिसलाई प्रतिबिम्ब गर्नु संगीको ‘ट्रेडमार्क’ नै हो ।

सामान्यतया अनुहारलाई गोलाकार आकृतिमा उतारिन्छ । तर, आयातकार आकृतिमा उतार्नुको पछाडि संगीको आफ्नै तर्क छ । “केटा होस् वा केटी हामीलाई जे कुरामा पनि पाबन्दी छ । जस्तै : धेरै हाँस्नु हुन्न है, अरूको अगाडि रुनु हुन्न है । यसरी हरेक कुरामा बन्देज लगाउन खोजिन्छ,” कलाकार श्रेष्ठ भन्छिन्, “यो निश्चित एकार्कासँग जोडिएका सिधा धर्का र वर्गााकारले हामीले आफ्नो हरेक भावनालाई रोकिरहेका हुन्छौँ भन्ने कुरा देखाउन खोजेको छु । यसमा वृत्त नराख्नुको कारण सर्कलले स्वतन्त्रता नै देखाउँछ ।”

कलाकार संगीको अर्को विशेषता भनेको हरेकको भावनालाई रङमार्फत चित्रण गर्नु पनि हो । संवेग शीर्षकमा एकल प्रदर्शनीमा राखिएका उनका कला आउँदो अक्टोबर ८ सम्म अवलोकन गर्न सकिन्छ ।

प्रदर्शनीमा राखिएका उनका चित्रकलामा योपटक धार्मिक आस्था तथा विश्वास र प्रविधिको पनि झलक देखिन्छ ।