काठमाडौं । कुनै पनि चलचित्रको गीत जति हिट हुन्छ, त्यसलाई क्यामेरा पछाडि बसेर गाउने गायक/गायिकाको चर्चा त्यति हुँदैन । सामान्यतया चलचित्रका गीतहरू त्यसका अभिनेता र अभिनेत्रीका नामले चिनिन्छ । आफूहरू छायामा पर्ने गरेको र गीत हिट हुँदा पनि दर्शक–स्रोताले नचिन्ने गरेको पाश्र्वगायक/गायिकाहरू गुनासो गर्छन् ।

पछिल्लो एक दशकभन्दा लामो समयदेखि पार्श्वगायनमै रमाइरहेकी गायिका प्रविशा अधिकारीको धारणा भने फरक छ । “अहँ ! मलाई त्यस्तो लाग्दैन । पाश्र्वगायनको लागि भ्वाइस सुट हुनु भनेको आफैँमा ठूलो कुरा हो । किनभने, जो कोहीको पनि पार्श्वगायनका लागि आवाज मिल्दैन । चाहेर पनि म्याच भइराखेको हुँदैन । त्यसैले मेरो आवाज यसको लागि सुट हुन्छ भने म खुसी छु ।”

पार्श्वगायक/गायिकाको आवाजलाई पर्दाका अभिनेता/अभिनेत्रीले पूर्णता दिने उनी बताउँछिन् ।

पछिल्लो १४ वर्षदेखि पार्श्वगायनमा सक्रिय प्रविशाले पहिलोपटक आफ्नै शब्द, कम्पोजिसन र स्वरमा ‘शब्द’ गीत रिलिज गरेकी छन् । जसमा प्रविशा स्वयं फिचर्ड पनि भएकी छन् ।

उनको स्वरसँगै सुन्दरताको पनि उत्तिकै तारिफ हुने गर्छ । त्यसैले त उनलाई केही चलचित्रमा अभिनयको पनि अफर नआएको होइन । तर, उनी अहिले गायनमा नै रमाइरहेकी छन् । राम्रो कथा वा राम्रो ब्यानरबाट अफर आए भोलिका दिनमा चलचित्रको पर्दामा पनि देखिन सक्ने प्रविशा बताउँछिन् ।

“पहिला आउने गर्दथ्यो । तर, अहिले आएको छैन । यसै चलचित्र खेलौँ भन्ने पनि हुँदैन । त्यसको लागि अभिनय क्षमता अनि त्यसमा आफू फिट छु कि नाइँ भन्ने कुरा पनि ध्यानमा राख्नुपर्ने हुन्छ । त्यसैले मलाई यसको लागि परिपक्व छु जस्तो लाग्दैन,” प्रविशा भन्छिन् ।

०६४ सालमा चलचित्र ‘बिदाइ’बाट पार्श्वगायनमा प्रवेश गरेकी हुन् । आफ्नो ‘प्यासन’लाई पेसा बनाउन पाएकोमा उनी खुसी छन् ।

उनले रेखा थापा, झरना थापालगायत अभिनीत चलचित्रमा गीत गाइसकेकी छन् । पछिल्लो पुस्ताका अभिनेत्रीहरू सुहाना थापा, मिरुना मगर, क्रिस्टिना गुरुङलगायत अभिनीत चलचित्रमा पनि गीत गाएकी छन् ।

अचानक आएको अफर
स्कुल, घरमा गीत गुनगुनाइरहने हुँदा साथी र परिवारमा ‘कान्छी छोरीले राम्रो गाउँछ है’ भन्ने थियो । अचानक चलचित्र ‘बिदाइ’मा पार्श्वगायनका लागि अफर आउँदा उनी खुसी र छक्क एकैसाथ भइन् ।

घरमा कान्छी छोरीले डाक्टर वा यस्तै केही पेसा रोजोस् भन्ने थियो । उनको आफ्नै सोचचाहिँ बुवाजस्तै कुनै व्यवसाय सुरु गर्ने थियो । तर, कुनै सोच र योजनाबिना नै यो क्षेत्रमा प्रवेश गरिन् ।

कामको कदर
सांगीतिक क्षेत्रभित्र उनको कामको सधैँ कदर र सम्मान भएको महसुस उनले गरेकी छन् । हालै ‘द भ्वाइस किड्स’को ‘कोच’को रूपमा जोडिएकी छन् । उनी आफूलाई जजभन्दा पनि कोच भन्न रुचाउँछिन् । यो मौकालाई एक हिसाबमा आफ्नो सफलताको रूपमा लिन्छिन् । साथै, थप जिम्मेवारीबोध भएको महसुस पनि गरिरहेको उनी बताउँछिन् ।

पारिश्रमिक
पारिश्रमिकको कुरामा कहिले सन्तुष्टि त कहिलेकाहीँ चित्तबुझ्दो नहुने उनी बताउँछिन् । यसबारेमा उनी निर्माताहरूसँग कुरा पनि गरिरहन्छिन् ।

यही पेसामा लागेर जीवन धान्न सक्नेमा प्रविशा विश्वस्त छन् । तर, कसले कस्तो जीवनशैली बाँचिरहेको छ भन्ने कुराले भने फरक पार्ने उनको भनाइ छ ।

टर्निङ प्वाइन्ट 
उनको पहिलो गीत दर्शकले निकै रुचाए । तर, त्यो गीतले उनलाई भने चिनाउन सकेन । त्यसैले पनि होला, करियरको टर्निङ प्वाइन्ट वा प्रविशा अधिकारी भनेर चिनाएको गीत चलचित्र ‘रोज’को ‘फूल होइन’लाई लिन्छिन् । उनकै शब्दमा भन्नुपर्दा ‘प्रविशा रिबर्थ’ भएको गीत हो यो ।

सहकार्य गर्ने इच्छा 
उनलाई गायनमा सहकार्य गर्न मन भएका थुप्रै गायकहरू छन्, तर तीमध्ये गायक सजनराज वैद्यसँग ड्युट गर्ने मन भएको उनी बताउँछिन् । पछिल्लो समय उनले सुन्ने गीतको सूचीमा गायक सजनको गीत पहिलो नम्बरमा पर्छ ।

चलचित्रमा भने अभिनेता प्रदीप खड्का उनको पहिलो रोजाइमा पर्छन् । डेब्यु चलचित्रमा प्रदीपसँग काम गर्न सहज हुन्छ कि भन्ने उनलाई लाग्छ । तर, तत्काल चलचित्र खेलिहाल्ने कुनै सोच भने उनको छैन ।

थरीथरीका प्रशंसक
पछिल्लो समय कसैसँग प्रेममा रहेकी प्रविशालाई कैयौँ प्रशंसकहरूबाट प्रेमप्रस्तावहरू आइरहन्छन् । यति मात्रै कहाँ हो र उनको नाममा ट्याटु खोप्ने पुरुष प्रशंसकहरू पनि छन् ।

यस्ता प्रशंसकहरूको मायाका लागि प्रविशा आभारी छन् । तर, माया दर्साउने अरू थुप्रै माध्यम भएकाले यसरी ट्याटु खोप्नेजस्ता क्रियाकलाप भने नगर्न उनी आग्रह गर्छिन् ।

सिनियर गायक/गायिकाहरूलक्षित कार्यक्रम तथा चलचित्रको प्रमोसनका क्रममा कलाकारहरूको पछिपछि गएर प्रस्तुति दिनुभन्दा आफ्नो लागि छुट्टै आयोजना भएको कार्यक्रममा जाने इच्छा प्रविशाको छ । उनको यो चाहना पूरा हुन पनि लागेको थियो । यद्यपि, कोरोनाले विशेषगरी उनका लागि भनेर आयोजना हुन लागेका देश–विदेशका कार्यक्रमहरू रोकिएकोमा उनी दुःखी छिन् । सावधानी अपनाएर रेकर्डिङमा भने व्यस्त नै छिन् ।

मनपर्ने परिकार
थुक्पा, विशेषगरी नुडल्स
मनपर्ने रङ 
कालो 
मनपर्ने गायक/गायिका
सुगम पोखरेल, प्रताप दास र अञ्जु पन्त
मनपर्ने महिना
माघ
मनपर्ने ठाउँ
मनाङ–मुस्ताङ
मनपर्ने पहिरन 
क्याजुअल
मनपर्ने गीत
सजनराज वैद्यको चिठीभित्र... 
बलियो र कमजोर पाटो
बलियो पाटो सकारात्मक सोच र कमजोर पाटो अरूको खुसीका लागि आफ्नो खुसी र इच्छा पनि मार्नु ।
जीवन
अज्ञात यात्रा, जुन यात्रामा हामीले हरेक कदममा खुसी हुने प्रयास गर्नुपर्छ ।

तस्बिर ः हरिशजंग क्षेत्री