काठमाडौं । सयौं थुम्काले बनेको सैलुङ दोलखा र रामेछापको सीमामा पर्छ । काठमाडौंबाट झन्डै १२० किलोमिटर उत्तरपूर्वमा रहेको सैलुङ जुनसुकै मौसममा पनि जान सकिन्छ ।

सैलुङको बेसक्यामका रूपमा परिचित कालापानीसम्म मोटर बाटो छ । कालापानीबाट करिब एक घण्टा पैदल यात्रापछि ३१५० मिटर अग्लो महाभारत शृङ्खलाको रमणीय स्थलमा पुग्‍न सकिन्छ जो सैलुङ नामबाट परिचित छ ।

आकाश खुलेको समय सैलुङबाट गौरीशंकर, धौलागिरिदेखि लाङटाङ, मनासलुलगायत हिमशृङ्खलाको दृष्यावलोकन गर्न सकिन्छ । सैलुङमा १०० भन्दा धेरै थुम्का छन् । त्यसले आफ्नै धार्मिक महत्त्व बोकेको छ । बौद्ध धर्मावम्लबीहरूले सैलुङको थुम्कामा पितृको नाममा पूजा गर्ने गर्छन् ।

त्यस्तै, सैलुङ पैदलयात्रा गर्दा गुप्तेश्वर महादेव, सैलुङ्‍गेश्‍वर महादेव, भीमसेनको तरबार, दफेढुंगा, पृथ्वीको नाइटो, बुद्धको पाइलाजस्ता धेरै धार्मिकस्थल घुम्‍न पाइन्छ । हिउँ पर्ने भएकाले जाडोमा हिउँ र फूल, गुराँस, हरियाली मन पराउनेहरुलाई पनि अरु मौसमले स्वागत गर्छ ।

प्राकृतिक, धार्मिक दृष्टिकोणबाट विशेष महत्त्व बोकेको सैलुङमा आगन्तुकहरुको सहजताका लागि पूर्वाधारको निर्माण सुरु भएको छ । होमस्टे, होटेलहरु निर्माणको तयारी हुँदै छ । सुन्दर, रमणीय सैलुङले आन्तरिक र बाह्‍य पर्यटकको स्वागत गर्न तयार बसेको पाइन्छ । हेरौं थप तस्बिर :