काठमाडौं । न्यूरोडको एक क्षेत्रलाई यतिबेला छातै–छाताले सिंगारिएको छ ।

छाताले सडकखन्ड सुन्दर देखिएको छ । मानिसको भिड बढ्न थालेको छ । कोही फोटो खिचिरहेका त कोही नाचिरहेकासमेत देखिन्छन् । रङ्गीचङ्गी छातामुनि घुमिरहेका मानिसको दृष्य मनमोहक लाग्छ । न्यूरोड गेटबाट सुन्धारामार्ग हुँदै संकटा जाने सडकखन्ड छातै–छाताले सजाइएको हो ।

कोरोनाभाइरसले विश्वभर संकट निम्त्यायो । लामो ‘लकडाउन’का कारण व्यापार–व्यवसाय ठप्प भयो । जसको प्रत्यक्ष मारमा राजधानीको मुख्य व्यापारिक केन्द्र न्यूरोडका व्यापारी पनि परे ।

लकडाउन खुलेसँगै चहलपहल विस्तारै बढ्न थाल्यो । तर, व्यापारले पहिलेजस्तो गति लिएन ।

व्यापारको स्तर माथि उठाउनका लागि मानिसलाई न्यूरोडतिर तान्नुपर्ने थियो । त्यसका लागि बनेको योजनाले न्यूरोड, संकटा क्षेत्र अहिले जोकोहीका लागि आकर्षक स्थल बन्न पुगेको छ ।

बाटोमा करिब ४०० ओटा रङ्गीचङ्गी छाता झुन्ड्याइएको छ । हेर्दै आकर्षक र रमणीय अनुभव हुन्छ । पिच सडक सफा–सुग्घर देखिन्छ । करिब १५० मिटरको दूरीमा छातै–छाता झुन्ड्याइएको छ । सडकछेउमा फूलको गमला पनि राखिएको छ ।

निकै रोचक बनेको छ, अहिले यो क्षेत्र । दैनिक ठूलो संख्यामा मानिस घुम्न आउँछन् । युवा–युवती फोटो खिच्न र टिकटक बनाउनसमेत यहाँ आउने गरेका छन् ।

संकटा क्लबका सचिव आशिषमान सिंहले व्यापार–व्यवसाय नभएको र धरहराको पुनःनिर्माण अन्तिम चरणमा पुगेको अवस्थामा मानिसलाई आकर्षित गर्न यस्तो गरिएको बताए ।

व्यापार प्रवद्र्धन र आन्तरिक तथा बाह्य पर्यटकको आकर्षक स्थल बनाउन यो उपाय अपनाइएको उनले सुनाए ।

‘यस्तो उपाय पोर्चुगल जाँदा देखेको थिएँ,’’ उनले  भने, ‘‘नेपालमा योभन्दा पहिला चितवनमा गरिएको थियो । अहिले काठमाडौंमा पहिलोपटक हो । १० दिनमै यहाँ मानिसको भिड बढेको छ । पहिले दैनिक १५ सयको हाराहारीमा आउँथे होला । अहिले दैनिक १५ हजारको हाराहारीमा यहाँ घुम्न आउने गर्छन् । यसले विस्तारै व्यापारले पनि गति लेला ।’’

गएको मंसिर महिनाको अन्तिम दिन । न्यूरोड, तेबहाल क्षेत्रका व्यापारीहरुबीचको चियागफ व्यापार कसरी उकास्ने भन्ने विषयमा केन्द्रित भयो । संकटा क्लबका सचिव सिंहले पोर्चुगल जाँदा आफूले ‘अम्ब्रेला स्ट्रील’ देखेको सुनाए ।

‘‘हामी पनि त्यही उपाय अपनाएर अगाडि बढ्ने हो कि ?’’ उनले प्रस्ताव राखे । उनको प्रस्ताव अरुलाई पनि मन प¥यो । ‘‘हुन्छ, गरौँ न त । कोरोनाले यस्तो गरिहाल्यो, यति गर्दा के बिग्रिएला र !’’ सहमति जुट्यो । व्यापारीबाट ८० हजार रूपैयाँ संकलन गरियो । त्यही दिनदेखि सुरु भयो, रङ्गीचङ्गी छातै–छातासहित बाटो सिंगार्ने काम ।

कोरोना संक्रमणको जोखिमबाट जोगिन यहाँ आउनेलाई स्वास्थ्य सुरक्षाका मापदण्ड पालना गर्न आग्रह पनि गर्ने गरिएको उनले बताए । यहाँको व्यापार–व्यवसाय एकैचोटि माथि नउठे पनि विस्तारै फस्टाउने उनीहरूको आशा छ । हेरौं थप तस्बिर :