दाङ । दाङमा आजदेखि दोस्रो चरणको लकडाउन सुरु भएको छ ।

लकडाउन सुरु भएसँगै दाङ सुनसान छ । समुदाय स्तरमा कोरोना संक्रमण पुष्टि भएपछि दाङको तुलसीपुर, घोराही, लमही, भालुवाङ, नारायणपुर, हापुरेलगायत अन्य बजार पनि सुनसान छन् । जिल्ला प्रशासन कार्यालय दाङले भदौ २१ गते राति १२ बजेसम्म लकडाउन गरेको छ । 

लकडाउन कडाइका साथ लागु गरिने दाङका प्रमुख जिल्ला अधिकारी गोविन्द रिजालले बताए । उनले मानिसहरुको हिँडडुललाई नियन्त्रण गर्ने, अत्यावश्यकबाहेक सवारीसाधनहरुलाई नियन्त्रण गर्ने, एक सातासम्म सम्पूर्ण व्यापार, व्यवसाय बन्द गर्ने बताएका छन् । यो अवधिमा उद्योग, कलकारखाना, यातायात, बजार, कार्यालय, बैंक तथा वित्तीय संस्था बन्द रहने समिति संयोजक एवं प्रमुख जिल्ला अधिकारी रिजालले जानकारी दिए ।

पछिल्लो चरणमा जिल्लाको घोराही, तुलसीपुर उपमहानगरपालिका र राप्ती गाउँपालिकामा समुदाय स्तरमा कोरोना भाइरसका संक्रमित फेला परेपछि उच्च सतर्कता अपनाउँदै जिल्लालाई नै पूर्ण रूपमा निषेधाज्ञा लगाउनुपरेको उनले बताए ।

समुदाय स्तरमा कोरोना संक्रमण फेला परेपछि राप्ती उपक्षेत्रिय अस्पताल तुलसीपुर, घोराही १० को क्षेत्र, राप्ती गाउँपालिकाको वडा १, ४ र ८ का ५ वटा टोल अहिले सिल गरिएको छ । तुलसीपुर क्षेत्रका केही स्थान पनि उच्च निगरानीमा राखिएको छ । यसअघि स्थानीय प्रशासनले भदौ १ बाट जिल्लामा अनिश्चितकालीन रात्रिकालीन निषेधाज्ञा लगाएको छ ।

जिल्लामा कोरोना संक्रमितको संख्या ७७२ पुगेको छ । त्यसमध्ये ६९८ जना उपचारपछि घर फर्किसकेका छन् । जिल्लामा हाल सक्रिय संक्रमित ७२ जना छन् । त्यसमध्ये २ जनाको भने मृत्यु भइसकेको छ ।