काठमाडौं । दुई वटा वाइडबडी हवाइजहाज खरिदका लागि नेपाल वायुसेवा निगमले सोमबार नागरिक लगानी कोषसँग ऋण सम्झौता गरेको छ । निगम र लगानी कोषबीच १२ अर्ब रुपैयाँको ऋण सम्झौता भएको हो । ९ प्रतिशत ब्याजदरमा उक्त ऋण सम्झौता भएको हो । 

यसअघि आइतबार कर्मचारी सञ्चय कोषसँग पनि १२ अर्बकै ऋण सम्झौता भएको थियो ।  ९ र १२ प्रतिशतमा सौदाबाजी हुँदा करिब एक महिनाअगाडि नै हुने भनिएको ऋण सम्झौता हुन सकेको थिएन । विमान खरिदका लागि निगमले २४ अर्ब ऋण लिएको हो ।

“१५ वर्षमा तिर्नेगरी ऋण सम्झौता भएको छ,” निगमका प्रवक्ता रविन्द्र श्रेष्ठले भने, “पहिलो किस्ताको रकम चाँडै लिने प्रक्रिया पनि सुरु भइसकेको छ ।”

पूर्व निर्धारित मितिमै ऋण सम्झौता हुन नसक्दा निगमले समयमै जहाज खरिद गर्न अमेरिकी कम्पनी एएआरलाई बैना रकम पठाउन सकेको छैन । निगमका सहप्रक्ता शैलेष कंसाकारले अर्को हप्तासम्म दुवै कम्पनीबाट पहिलो किस्ताको चार-चार अर्ब ऋण लिने तयारी भइरहेको बताए । उक्त रकम लिनेबित्तिकै निगमले एएआरलाई बैना रकम पठाउनेछ । 

निगमले गत वर्ष माघ महिनामा ३०० सिरिजको दुईवटा ‘वाइड वडी’ जहाज किन्न खरिद सम्झौता गरेको थियो ।

व्याजदरसँगै प्रस्तावित सम्झौताका केही प्रावधानमा स्पष्ट नभएका कारण सम्झौतापत्रमा हस्ताक्षर हुन ढिलो भएको थियो । सम्झौताका लागि तोकिएको समयमा जहाज खरिद गर्ने बेला हतारमा गरिएका सम्झौताका कतिपय बुँदाहरु स्पष्ट भएको र त्यसले पछि विवाद उत्पन्न गर्न सक्ने भन्दै दुवै निकायले निगमलाई पत्राचार गरेका थिए । 

निगमले एएआरसँग २०७३ चैत २५ गते दुईटा वाइडबडी किन्ने सम्झौता गरेको थियो । सम्झौता अनुसार दुई जहाजको मूल्य २१ अर्ब ५८ करोड ८८ लाख रुपैयाँ पर्नेछ । सम्झौताअनुसार पहिलो वाइडबडी विमान ०७५ असार १६ गतेभित्र र त्यसको एक महिनापछि अर्को विमान आइपुग्नेछ । 

निगमले २८० सिट क्षमताको वाइडबडी ए ३३०–२०० खरिद गर्न लागेको हो । विमानमा १६ वटा बिजनेस क्लास र २६४ इकोनोमी क्लासका सिट छन् । 

नयाँ विमान खरिद गरेपछि निगमको नयाँ एयरबसले दमाम, सिओल, सिड्नी र टोकियोमा नियमित उडान गर्नेछ ।