विराटनगर । मोरङको धनपालथान गाउँपालिका २, पौठाबाट चोरी–निकासी गर्न लागिएको हरियो मटर प्रहरीले बरामद गरेको छ ।

नेपालबाट भारततर्फ अवैध रूपमा चोरी–निकासी गरी को.१ख ४८८७ नम्बरको मिनी ट्रकमा ६ हजार २५० केजी मटर बरामद भएको जिल्ला प्रहरी कार्यालय मोरङले जनाएको छ ।

यसको मूल्य करिब पाँच लाख रुपैयाँ भएको र गोप्य सूचनाका आधारमा सीमा प्रहरी चौकी मायागन्जबाट प्रहरी टोली परिचालन भएको जिल्ला प्रहरी कार्यालयका प्रवक्ता डीएसपी मानबहादुर राईले जानकारी दिए । 

प्रहरी टोली पुग्न साथ उक्त हरियो मटरसहितको मिनी ट्रक छाडेर चालक फरार भएको र चालकको खोजी जारी रहेको राईले बताए । बरामद हरियो मटरसहितको ट्रक इप्रका रंगेली ल्याई मूल भन्सार कार्यालय रानीमा पठाउने तयारी भएको पनि उनले बताए । 

राईका अनुसार हरियो मटर धनपालथान गाउँपालिका २ बस्ने दिलीप साहको भन्ने प्रारम्भिक अनुसन्धानका क्रममा खुल्न आएको छ । उनी पनि फरार रहेको र खोजी पनि जारी रहेको डीएसपी राईले बताए ।