केही दिनअघि गायिका प्रीति आलेले गाएको तीज गीत ‘फरिया लरिलै बरिलै...’ सार्वजनिक भयो । नयाँ पुस्तालाई लक्षित गरी गाएको गीत मौलिक लय र भिडियोबाट केही टाढा देखिन्छ । नयाँ पुस्तालक्षित भएकाले टिपिकल नभए पनि पचाउनै नसकिने भने नरहेको र पछिल्लो पुस्ताले मन पराएको प्रीति बताउँछिन् । शब्दअनुसारकै भिडियो निर्माण भएको भन्दै आपत्ति जनाउनुपर्ने खालको भिडियो नभएको उनी दाबी गर्छिन् । गीतबाट आएको मिश्रित प्रतिक्रियालाई आफूले सकारात्मक रूपमा लिएको भन्दै प्रीति आफू पहिरनमा निकै सचेत रहेको बताउँछिन् । उनै गायिका आलेसँग बाह्रखरीेले गरेको कुराकानी  :

केही दिनअगाडि सार्वजनिक तीज गीत ‘फरिया लरिलै बरिलै...’ मा मिश्रित प्रतिक्रिया आएको हो ?
हो, यो गीतमा दुवै खालका प्रतिक्रिया आइरहेका छन् । नयाँ पुस्ताले मन पराउनुभएको छ । तर पुरानो पुस्ता जो पुरानै प्रकृतिका तीज गीत मन पराउनुहुन्छ उहाँहरूले केही असन्तुष्टि जनाउनुभएको छ । जो मौलिक गीतको अपेक्षा गर्नुहुन्छ उहाँहरूले चित्त दुखाउनुभएको छ । 

गीतमा शब्द–संगीतअनुसार उच्चारण नभएकाले अपेक्षितभन्दा फरक भयो भन्ने टिप्पणी आयो नि ?
पुरानो गीत चाहनेहरूले आपत्ति जनाउनुभएको हो । तर नयाँ पुस्ताका भाइ–बहिनीहरूले धेरै नै मन पराउनुभएको छ । त्यसैले एकदम धेरै बिग्रियो भन्ने पनि होइन र साँच्चै मौलिक छ पनि म भन्दिनँ । 

संस्कृतिसँग जोडिएको तीज गीतको भिडियो भएन भन्ने थुप्रै प्रतिक्रिया आए । ड्रेसअप अलि भड्किलो भएकै हो ?
जहाँ चर्चा त्यहाँ विवाद, जहाँ विवाद त्यहाँ चर्चा हुन्छ । ‘फरिया लरिलै बरिलै...’ बजारमा आउनुभन्दा अगाडि र त्योभन्दा पछि आएका तीज गीतको भिडियोमा हाफ पाइन्ट मात्रै लगाएर उफ्रिएका पनि छन् । तर ती गीत चर्चामा नआएका कारण तिनीहरूको टिप्पणी भएन । मेरो गीत चर्चामा आयो त्यसैले केही टिकाटिप्पणी भयो । यसलाई मैले स्वाभाविक रूपमा लिएको छु । 

रचनाकार तथा गायक एकनारायण भण्डारीले नै भिडियोमा असन्तुष्टि जनाउनु भयो नि ?
कसको काम के हो भन्ने हो । एकनारायण दाइको शब्द लेख्ने हो, लेख्नुभयो । मेरो काम गाउने हो गाएँ । शब्द लेखिसकेपछि मैले गाएँ । त्यसपछि गीत भिडियो मेकिङको प्रक्रियामा जान्छ । त्यो दाइको क्षेत्रभन्दा बाहिरको कुरा हो । गीतको शब्दले के मागेको छ त्यसअनुसार भिडियो बनाउने हो । अरूले गरेको काममा सन्तुष्ट हुन पनि पाइयो असन्तुष्टि जनाउन पनि पाइयो । 

एकनारायणलाई प्रीतिलाई किन गीत दिएको, उनले गाएकै कारण गीत भड्किलो भयो भन्नेलाई तपाईंको जवाफ के छ ?
भड्किलो त फिटिक्कै होइन । दोहोरी गीत योभन्दा कति भड्किला छन् । त्यस्ता गीतलाई पनि हामीले सुनिरहेको, हेरिरहेको र स्वीकार गरिरहेको पनि हो । त्यसैले मेरो यो गीत भड्किलो भयो भनेर म स्वीकार गर्ने पक्षमा छैन । गाला जोडेको र मुख जोडेको नेपाली गीतको भिडियो कति छन् छन्, ती भिडियो हामीले हेरिरहेका छौं । तर यो गीतमा त्यस्तो केही छैन । महिला मात्रै भएको भिडियो हो । योभन्दा कति उत्ताउला भिडियो दर्शकले सहज रूपमा लिनुभएको छ । भिडियोभन्दा पनि गीतको शैलीमै केहीले आपत्ति जनाउनुभएको हो । टिपिकल शब्द संगीत चाहनेहरूले आपत्ति जनाउनुभएको हो । नयाँ पुस्ताले मन पराउनुभएको छ, म खुसी नै छु ।

कला संस्कृतिसँग जोडिएको लोकगीत गाउनुहुन्छ, तर गेटअप र प्रस्तुतिचाहिँ फरक हुन्छ भन्ने आरोप लाग्छ, तपाईंले यो महसुस गर्नुभएको छ ?
लोक गीत–संगीतमा मेरो पहिरनको पहिचान लोक नै हुन्छ । अधिकांश प्रस्तुतिमा म लोक पहिरन मगर जातिको वेशभूषा लगाएर हिँड्ने कलाकार हुँ । कपाल काटेको र ट्याटु खोपेको भए पनि स्टेजमा लोक पहिरनमै जाने कलाकारमा पर्छु म । पप गीत पनि मेरो विधामा पर्ने भएकाले पप र ब्याटल गाउँदा फरिया चोली लगाएर भएन । जहाँ जे सुहाउँछ त्यो लगाउने मेरो प्रयास हो । 

तपाईंका गीत स्टेजलक्षित बढी भए भन्ने टिप्पणी छ, तपाईंको पहिलो प्राथमिकता स्टेज नै हो ?
हो । कारण स्लो गीत मैले गाएको पनि छैन । गाउँन सक्दिनँ पनि र सुन्न पनि खासै मन पर्दैन । सबै व्यक्तिको एउटै चाहना हुन्छ भन्ने पनि छैन । म रमाइलो खालको भएकाले पनि होला मलाई फास्ट गीत नै मनपर्छ । र हामीलाई स्टेजमा धेरै चाहिने पनि फास्ट गीत नै हो । स्टेजमा धेरै हिँड्ने हामीलाई दर्शक नचाउन पनि फास्ट बिटका गीत चाहिन्छ ।
 
लोक होइन रकपप जनरा तपाईंलाई सुहाउँछ भन्नेलाई के भन्नुहुन्छ ? 
राम्रो सुझाव हो । रकपप पनि मेरो विधा हो । यो मलाई धेरै मनपर्ने विधा हो । 

शब्द चयन र शारीरिक एक्सप्रेसनमा ध्यान नदिँदा बेलाबेलामा विवादमा फसिरहनु हुन्छ, यसमा सुधार गर्न नचाहनुभएको कि नसकेको ?
समयअनुसार हिँड्न खोजेको हुँ । नयाँ पुस्ताले मन पराउन् मेरो चाहना हो । त्यहीअनुसार मैलै नयाँ पुस्तालाई न्याय गर्न खोजेको हुँ । नयाँ पुस्तालाई लक्षित गर्न खोज्दा पुरानो पुस्ताले असन्तुष्टि जनाएको हो । 

विवादले थप ऊर्जा दिने हो ?
मन पराउने धेरै भयो तर विरोध गर्ने थोरै भयो भने ऊर्जा थपिन्छ । तर विरोध गर्ने पनि धेरै हुनुभयो भने मैले मलाई केही सुधार गर्नुपर्छ भन्ने लाग्छ । तर अहिलेसम्म मैले गरेको काममा धेरैले मन पराइदिनुभएको तर थोरैले मात्रै असन्तुष्टि जनाउनु भएकाले खुसी नै छु । दर्शकले मन पराउँदासम्म अहिलेसम्म मैले गाएका गीतकै फ्लेबरका गीत अझै गाउन चाहन्छु । 

साधनाअनुसार गीत छनोट गर्न सक्नुहुन्न भन्ने आरोप छ नि ? 
मैले छनोट गरेर गाउने होइन गीतले नै मलाई छनोट गरेर आउँछ । गीतले नै मलाई खोज्दै आउँछ । ‘फरिया लरिलै बरिलै...’ पनि मैले मागेको गीत होइन । मलाई खोज्दै आएको हो । एकनारायण दाइले प्रीति बहिनी तिमीलाई सुहाउने गीत छ गाइदिनुपर्यो भन्नुभएको हो । त्यसैले गीतले मलाई खोज्दै आउँछ, गीत मैले खोज्ने होइन ।