एजेन्सी । सांगीतिक क्षेत्रको ठूलो अवार्ड ‘अमेरिकन म्युजिक अवार्ड’२०२० आयोजना हुने भएको छ । अमेरिकन टेलिभिजन च्यानल एबीसी र यसको निर्माण कम्पनी डिक क्लार्कले अवार्ड यहि वर्षको नोभेम्बर २२ मा आयोजना हुने घोषणा गरेको हो ।
अवार्डमा मनोनितहरुको घोषणा अक्टोबरमा गरिने छ । अक्टोबरमा घोषणा गरिने नामांकनहरूमा पप र रक, अल्टरनेटिभ रक, कन्ट्री, र्याप र हिप-हप, सोल-आर एंडबी, ल्याटिन, ईडीएम जस्ता कोटीहरू समावेश छन् भने यस वर्षका नयाँ कलाकारका लागि पुरस्कार, कोल्याब्रेसन अफ द इयर, भिडियो अफ दी इयर, मनपर्ने गीत, र आर्टिस्ट अफ द इयर पनि प्रदान गरिने छ ।
यद्यपि समारोहमा दर्शक उपस्थित हुन पाउने वा नपाउने र समारोहको ढाँचाबारे भने केही उल्लेख गरिएको छैन ।
गतवर्ष गायिका टेलर स्विफ्टले ६ विधामा अवार्ड प्राप्त गरी जम्मा २८ विधामा पुरस्कार जितेर एएमएको इतिहासमै अहिलेसम्मकै सबैभन्दा धेरै अवार्ड प्राप्त गर्ने गायिका बनेकी थिइन् ।
उनले पपका राजा माइकल ज्याक्सनलाई पनि पछि पारेकी हुन् । माइकल ज्याक्सनले जम्मा २४ विधामा अवार्ड आफ्नो नाममा पार्न सफल भएका थिए ।
अवार्ड समारोह एबीसी च्यानलबाट प्रसारण गरिने छ । - इन्डियन एक्सप्रेस
