महामारीमा राम्रो काम गरेको भए सरकारका मन्त्रीहरूले कति स्याबासी पाउँथे होलान् ? विडम्बना,  स्वास्थ्य मन्त्रालयको राजनीतिक र प्रशासनिक नेतृत्वमाथि भ्रष्टाचार तथा चरम अव्यवस्थाको आरोप लाग्न पुग्यो । यस्तो आरोप अरू कसैका कारण लागेको भने होइन । महामारीलाई समेत कमाउने र आफन्त पोस्ने मौका बनाउन नहिचकिचाएको देखिएपछि स्वास्थ्य मन्त्रालयका मन्त्री र सचिव आलोचनाका पात्र बनेका हुन् । विशेषगरी, ओम्नी नामको व्यापारी समूहलाई पोस्न गरिएको चलखेलका कारण संसद्, सामाजिक सञ्जाल, सञ्चार माध्यमका साथै गाउँका चौतारा र बजारका चिया पसल जताततै स्वास्थ्य मन्त्रालयको नेतृत्वको आलोचना भएको छ । यही क्रममा नेपाल औषधि उत्पादक संघले पनि स्वास्थ्य मन्त्रालयमाथि स्यानिटाइजरको गुणस्तर परीक्षण र दर्ताविनै उत्पादन तथा विक्री वितरण गर्न दिएर जनस्वास्थ्यमाथि खेलबाड गरेको आरोप लगाएको छ । सरकारले मापदण्डविपरीतका स्यानिटाइजर विक्री गर्न दिएको विरोधमा औषधि उत्पादक संघ अगिल्लो सातादेखि आन्दोलनरत छ ।

नेपाल औषधि उत्पादक संघले सरकारमाथि ‘मापदण्डविपरीतको गुणस्तरहीन स्यानिटाइजर’ विक्री गर्न दिएको आरोप लगाएको छ । यसैगरी स्वदेशी उद्योगको उत्पादनको ‘गुड म्यानुफ्याक्चरिङ प्राक्टिस’ (जीएमपी) कोे परीक्षणपछि पनि प्रमाणीकरणका लागि महिनौ आलटाल गर्ने तर गुणस्तरहीन विदेशी उत्पादनलाई प्रोत्साहन दिने गरेको पनि आरोप संघले लगाएको छ । यी दुवै गम्भीर आरोप हुन् । यी आरोप सत्य हुन् भने त्यो जघन्य अपराध हो । कारणm संक्रमणबाट जोगिन प्रयोग गरिने स्यानिटाइजर नै गुणस्तरहीन भयो भने संक्रमण फैलन सक्छ । नेपाली उद्योगहरू स्यानिटाइजरको उत्पादनमा आत्मनिर्भर भइसकेको दाबी पनि उद्यमीहरूले गरेका छन् । त्यस अवस्थामा गुणस्तरहीन स्यानिटाइजर निर्बाध आयात गराउनु नेपालको औषधि उद्योगविरुद्धको षड्यन्त्र पनि हो । 

स्वास्थ्य मन्त्रालयको नेतृत्वले नै देशमा गुणस्तरहीन स्यानिटाइजर भित्र्याउन चलखेल गरेको आरोप झट्ट पत्याउन गाह्रो हुन्छ । किनभने, कोभिड—१९ को संक्रमणबाट जोगिनका लागि संसारभर प्रवर्धन गरिएको एउटा उपाय स्यानिटाइजरको प्रयोग पनि हो । विसंक्रमणका लागि घरभित्र साबुनपानीले हात धुन र घरबाहिर स्यानिटाइजर प्रयोग गर्न नेपालको स्वास्थ्य मन्त्रालयले पनि आह्वान गर्दै आएको छ । गुणस्तरहीन स्यानिटाइजरको प्रयोगबाट त संक्रमण पक्कै रोकिँदैन । बजारमा गुणस्तरहीन स्यानिटाइजर सरकारसमेतका कारण पठाइएको हो भने त्यो गम्भीर र अक्षम्य अपराध हो । परन्तु, विश्व स्वास्थ्य संगठनले अस्वीकार गरेको र धेरै मुलुकहरूले फिर्तासमेत गरेको रेपिड डायग्नोस्टिक टेस्ट किटको प्रयोगप्रति स्वास्थ्यमन्त्रीको बढी नै मोह देखिइसकेको छ । यसैले पनि यस्तो आरोपमा सहजै विश्वास हुन्छ । कमिसन त पक्कै पनि गुणस्तरहीन सामान बेच्नेहरूले नै बढी देलान् तर त्यसैको लोभमा जनताको स्वास्थ्यसँग खेलबाड गर्नु दण्डनीय र अक्षम्य अपराध हो । स्यानिटाइजरको गुणस्तरमा प्रश्न उठिसकेपछि सरकारले औषधि व्यवसायीहरूको आरोपको उत्तर दिनुपर्छ । नत्र आरडीटीको प्रयोगमा जस्तै गुणस्तरहीन स्यानिटाइजरको उत्पादन र वितरणमा पनि आर्थिक स्वार्थ रहेको प्रमाणित हुनेछ ।