काठमाडौं । विश्वभर महामारीका रूपमा फैलिएको कोरोना भाइरसका कारण नेपालमा पनि चैत ११ गतेदेखि भएको लकडाउन हालसम्म खुलेको छैन । लकडाउनका कारण सबै क्षेत्रमा असर परेको छ । जसमा नेपाली खेलकुद पनि अछुतो रहन सकेको छैन ।

विश्व स्तरमा केही खेलकुद गतिविधि सञ्चालन हुँदा नेपालमा भने प्रशिक्षण सुरुआत हुन पनि धेरै समय लाग्ने देखिन्छ । तर, राष्ट्रिय खेलकुद परिषद् (राखेप) को मौखिक अनुमतिमा ब्याडमिन्टन र ओलम्पिक छनोट अन्तर्गत करातेतर्फ खेलाडीको प्रशिक्षण सुरु भएको छ । त्यस्तै व्यक्तिगत विधाका अन्य खेलसहित संघलाई पनि मौखिक रुपमा प्रशिक्षण सुरु गर्न अनुमति दिए पनि सुरु हुन भने सकेको छैन ।

हाल फुटबल र क्रिकेट खेलाडी पनि संघको आधिकारिक प्रशिक्षणको प्रतीक्षामा छन् । यता सरकारले अनुमति नदिएको भन्दै राखेपले संघहरूलाई आधिकारिक प्रशिक्षण अनुमति दिनसकेको छैन । विश्व खेलकुद जगतमा फुटबल सुरु भइसकेको छ ।

इङ्ल्यान्डमा पनि बुधबारबाट अन्तर्राष्ट्रिय क्रिकेट गतिविधि सुरु हुँदैछ । अन्य देशहरुले पनि क्रिकेटका गतिविधि सञ्चालन गर्ने योजना सार्वजनिक भइरहेका बेला पाकिस्तान क्रिकेट टोली तीन खेलको टेस्ट र टी–ट्वान्टी सिरिजका लागि इंग्ल्यान्ड प्रस्थान गरिसकेको छ ।

राष्ट्रिय क्रिकेट टोलीका पूर्व कप्तान पासर खड्कासहित केही खेलाडीको समूह केही साता अघिदेखि प्रशिक्षणका लागि कीर्तिपुरस्थित टीयू क्रिकेट मैदान पुगेका थिए । जहाँ नेपाल क्रिकेट संघ (क्यान) र राखेपले अनुमति दिएको पाइँदैन ।

नेपाली राष्ट्रिय क्रिकेट टोलीका पूर्व कप्तान खड्काले खेल र खेलाडीमा लकडाउनले परेको समस्यालाई मध्यनजर गर्दै प्रशिक्षण सञ्चालन गर्न सरकारले निर्देशन दिएमा खेलाडीलाई सहज हुने बताउँछन् ।

पछिल्लो समयमा विश्व फुटबल जगत मैदानमा उत्रिएको र क्रिकेट पनि आजबाट सुरु हुन लागेकाले यो अवस्थामा सरकार तथा क्यानले पनि खेल सञ्चालनका लागि आवश्यक कदम चाल्दा खेलाडीका लागि सहज हुने खड्काले बताए ।

उनले हाल नेपाली राष्ट्रिय टोलीका काठमाडौंमा रहेका खेलाडीहरुले सानो समूह बनाएर सामाजिक दूरी कायम गर्दै प्रशिक्षण गरिरहेको भए पनि त्यो स्तरको प्रशिक्षणले खेलाडीलाई नपुग्ने बताए । 

“खेल सुरु गर्ने कुरा खेलाडीको हातमा छैन । खेलाडीले माथिल्लो स्तरको निर्णय पर्खिनु बाहेक अन्य उपाय छैन । कोरोनाले गर्दा सबै क्षेत्रमा असर पारेको छ । खेलकुदमा पनि यसले असर पारेको छ । यस्तो अवस्थामा खेलाडीले चाँडै प्रशिक्षण सुरु गर्नुस् भनेर दबाब दिने कुरा पनि भएन,” खड्काले बाह्रखरीसँगको कुराकानीमा भने ।

खड्काले विश्व खेलकुद जगत पछिल्लो समय विस्तारै सुरु भइरहेकाले नेपाली खेलकुद जगत सुरुआतको प्रयास गर्न समेत आग्रह गरेका छन् । उनले अन्य देशले प्रशिक्षण थालेकाले त्यसैको सिको गर्न सकिने खड्काको बुझाइछ ।

“अन्य देशमा पनि अहिले क्रिकेट सुरु हुने अवस्थामा छ । बुधबारबाट इंग्ल्यान्डमा क्रिकेट सुरु हुँदैछ । अन्य देशहरुले पनि प्रशिक्षण गरिरहेका छन् । उनीहरु प्रशिक्षण फर्केको कुरा र खेल खेल्न थालेको कुरालाई हामीले पनि सिको गर्न सक्छौं । तर, यो अवस्थामा मैले पनि केही भन्न सक्दिन । अवस्था चाँडै सामान्य भए मैदानमा भेट गरौंला,” खड्काले भने । 

खड्काले सरकारले निर्देशन दिएमा आफूहरुले सुरक्षित तरिकाले प्रशिक्षण गर्न तयार भएको पनि बताएका छन् । उनले यस्तो अवस्थामा सरकार तथा क्यानलाई खेलाडीले प्रशिक्षण गर्न दबाब दिने कुरा पनि अमानवीय ठहरिने भएकाले कोरोनाको अवस्था सामान्य नहुन्जेलसम्म सेल्फ प्रशिक्षण नै गर्दा सहज हुने बताए ।

“हामी सरकारको निर्देशन कुरिरहेका छौं । निर्देशन आउने बिक्तिकै पुनः प्रशिक्षण सुरु हुनेछ । लामो समयसम्म खेलमा नफर्कँदा खेलाडीलाई असर पर्ने कुरामा दुई मत छैन । सरकारको निर्देशन आएमा हामी त्यसलाई फलो गर्दै अघि बड्ने छौं,” खड्काले भने । 

नेपाली राष्ट्रिय टोलीका केही खेलाडीले अहिले सेल्फ प्रशिक्षण पनि गरिरहेका छन् । काठमाडौंमा हुने केही खेलाडीहरुले सानो समूह बनाउँदै टीयू क्रिकेट मैदानमा प्रशिक्षण गरिरहेका छन् । काठमाडौं बाहिर हुने खेलाडीले पनि आफ्नो तरिकाले सेल्फ प्रशिक्षण गरिरहेका छन् । आफूहरुको सेल्फ प्रशिक्षणले पनि केही सकज हुने खड्काले बताए । 

“लकडाउन पहिले पनि राष्ट्रिय टोलीको प्रशिक्षणबाहेक हामी सेल्फ प्रशिक्षण गरिरहेका हुन्थ्यौं । अहिलेको समयमा पनि त्यही गरिरहेका छौं । काठमाडौंमा रहेका खेलाडीहरुले सानो समूह बनाएर प्रशिक्षण गरिरहेका छौं । यो अवस्थाको प्रशिक्षणले पनि हामीलाई पुग्दैन,” खड्काले भने ।