काठमाडौं । नेपाली क्रिकेटका लागि पुबुदु दशानायके नौलो नाम होइन । नेपाली क्रिकेट टोलीले सन् २०१४ को ट्वान्टी–२० विश्वकप क्रिकेट खेल्नुमा उनको महत्वपूर्ण योगदान छ । 

नेपाली क्रिकेट विकासका लागि दीर्घकालीन सोच राख्ने उनै पुबुदु अहिले पुनः राष्ट्रिय टोली सम्हाल्दैछन् । दोस्रो पटक नेपाली क्रिकेट टोली सम्हाल्न लागेका पुबुदुका लागि दोस्रो इनिङस भने सहज हुने छैन ।
 
नेपाल क्रिकेट संघ (क्यान)ले शनिबार बोर्ड बैठकबाट उनलाई मुख्य प्रशिक्षकको जिम्मेवारी दिएको हो । खेलाडी र क्यानबीचको जुहारी चलिरहेको समयमा प्रशिक्षकको जिम्मेवारी सम्हालेका पुबुदुलाई अहिले दुई पक्षबीच समझदारी कायम गरेर लैजाने चुनौती छ ।  

पुबुदुले छाडेपछि विदेशी प्रशिक्षकहरुले नेपालमा धरै लामो समय विताएका छैनन् । यसअघिका प्रशिक्षक उमेश पटवाल र डेभ वाट्मोरले नेपाली टोलीमा एक वर्ष बिताएनन् । 

यस्ता छन् पुबुदुका चुनौतीहरु
टिममा एकता कायम गर्नु 
नेपाली क्रिकेटमा पछिल्लो समय क्यान दुई धारमा बिभाजित छ । क्यान जस्तै क्रिकेट खेलाडी पनि दुई धारमा बिभाजित छन् । आईसीसीको निलम्बनबाट पूर्ण रुपमा फुकुवा नभएको अवस्थामा क्यानमा राजनीति मौलाउन खोज्नु नेपाली क्रिकेटका लागि राम्रो होइन ।  

यस्तो अवस्थामा क्रिकेट खेलाडीमा एकता कायम गर्नु पुबुदुका लागि पहिलो चुनौती हुनेछ । 

‘सेन्ट्रल कन्ट्रयाक्ट’का लागि क्यानले गरेको खेलाडी वर्गीकरणमा असन्तुष्टि जनाउँदै कप्तान ज्ञानेन्द्र मल्लसहित चार खेलाडीले सार्वजनिक रूपमा वक्तव्यबाजी गरेका थिए । सोही विषयलाई लिएर क्यानले खेलाडीहरुसँग दुईपटक स्पष्टीकरण सोधिसकेको छ । दुई पटककै स्पष्टीकरण चित्त नबुझेको भन्दै छानविन समितिले कारवाही गर्नुपर्ने आसयको प्रतिवेदन क्यानलाई बुझाएको छ । त्यसैले अहिले क्यान ती चार खेलाडीहरुलाई कारवाही गर्ने योजनामा छ । पुबुदुलाई क्यान र खेलाडीबीच समन्वय गरेर लैजाने चुनौती छ । 

विश्वकपको ग्लोबल छनोट पार गर्ने 
नेपालले सन् २०२२ मा हुने आईसीसी ट्वान्टी–२० विश्वकपमा ग्लोबल छनोटको समूह ‘ए’मा यूएई, ओमान, आयरल्यान्ड, बहराइन, क्यानडा, जर्मनी र फिलिपिन्सविरुद्ध प्रतिस्पर्धा गर्दैछ । 

समूह ‘ए’का खेलहरु फेब्रुअरी १५ देखि २५ तारिखसम्म ओमानमा हुनेछन् । त्यसको तयारीका लागि नेपाललाई लामो समय छैन । पुबुदु डिसेम्बरभित्रै नेपाल आइपुग्ने छन् । त्यसपछि मात्र उनले खेलाडीहरुलाई बन्द प्रशिक्षणमा बोलाउनेछन् । नेपाललाई तयारीका लागि जम्मा ४५ दिन बाँकी हुनेछ । बलियो टोलीहरुसँग छोटो तयारीमा ग्लोबल छनोट खेल्न सहज हुनेछैन । 

नेपाल रहेको समूहमा ओमान, यूएई र आयरल्यान्ड बलियो प्रतिस्पर्धी हुन् । यस्तो अवस्थामा पुबुदुलाई नेपाललाई विश्वकपसम्म पुर्याउने ठूलो चुनौती छ । पुबुदुलाई चुनौतीसँगै नेपाललाई दोस्रो पटक विश्वकप खेलाउने अवसर पनि छ । 

अष्ट्रेलियामा हुने विश्वकप छनोटका लागि ग्लोबल छनोटको समूह ‘बी’मा हङकङ, अमेरिका, युगान्डा जिम्बाब्वे, नेदरल्यान्ड्स, युगान्डा, पीएनजी र सिंगापुर छन् । दुवै समूहबाट शीर्ष दुई टिमले विश्वकपमा स्थान बनाउनेछन् । 

लामो समय टिक्ने
मुख्य प्रशिक्षक पुबुदुले पहिलो पटक नेपाल आउँदा २०११ देखि २०१५ सम्म बसे ।   त्यसयता नेपाली क्रिकेट टोलीमा विदेशी प्रशिक्षक लामो समय टिक्न सकेका छैनन् । 

यसअघिका प्रशिक्षक डेभ वाट्मोर र उमेश पटवाल पनि लामो समय नेपालमा बसेनन् । त्यसकारण पनि क्यानले अहिले दीर्घकालीन सोच राखेर पुबुदुलाई दुई वर्षका लागि प्रशिक्षकको जिम्मेवारी दिएको छ । दुई वर्ष पुबुदुले नेपालमा नै बिताउनेमा क्यान विश्वस्त छ । 

डेभ वाट्मोर प्रशिक्षकमा नियुक्त भएको समयमा पनि पुबुदुले प्रशिक्षकका लागि आवेदन दिएका थिए । अन्तिम समय अन्तर्वार्ताबाट पुबुदुलाई क्यानले प्रशिक्षकको जिम्मेवारी दिन मानेन । 

यसअघि क्यानले मुख्य प्रशिक्षकलाई ६ महिनादेखि वर्ष दिनको सम्झौता दिने गरेको क्यानले पुबुदुलाई लामो समय दिएको छ । “मलाई विश्वास छ, उनको यो दुई वर्षे कार्यकालमा क्रिकेटले ठूलो उचाइ लिनेछ,” क्यानका अध्यक्ष चतुरबहादुर चन्दले विज्ञप्तिमा भनेका छन् ।

नेपाली क्रिकेटलाई नजिकबाट नियालेका पुबुदुलाई पनि लामो समय टिममा टिक्न चुनौती छ । 

समर्थकको आशालाई भरोसामा बदल्ने 
नेपाली समर्थकहरुले पुबुदुबाट ठूलो अपेक्षा गरेका छन् । नेपाललाई पहिलो पटक विश्वकप क्रिकेट खेलाएर सबैको प्यारो बनेका पुबुदुलाई समर्थकहरुले उनीबाट ठूलो सफलताको अपेक्षा गरेका छन् । 

क्यानडा र अमेरिकाको प्रशिक्षकका रूपमा काम गरिसकेका पुबुदु प्रशिक्षकको रुपमा राम्रो अनुभव छ । सोही अनुभवलाई अहिले उपयोग गरेर नेपाली समर्थकलाई खुसी बनाउने चुनौती पुबुदुमा छ । त्यसको पहिले पाइला विश्वकपको ग्लोबल छनोट पार गर्नु हो । पुबुदुले टिम सम्हालेको समयभन्दा अहिले धेरै परिवर्तन छ । 

नेपालले एकदिवसीय क्रिकेटको मान्यता पाइसकेको अवस्थामा पुबुदुले टिम सम्हालेका छन् । नयाँ खेलाडीलाई सकरात्मक उर्जा सहित लैजाने चुनौती पुबुदुमा छ । 

टिममा रहेका खेलाडी र नयाँ अनुहारलाई समेट्दै बलियो टोली तयार पारेर उत्कृष्ट प्रदर्शन गर्दै नेपाली समर्थकलाई खुसी पार्ने मौका पनि पुबुदुमा छ ।