काठमाडौं । “असम्भव थिएन,  सम्भावनाका सिँढी धेरै देखिन्थे । नेपाली महिला क्रिकेट टोलीका लागि यस्तो अवसर फेरि आउला नआउला । तर, हामी आफै चुक्यौ,” राष्ट्रिय क्रिकेट टोलीका कप्तान रुबिना क्षत्रीले भनिन् । ट्वान्टी–२० विश्वकपको एसियाली छनोटबाटै बाहिरिएपछि उनले यस्तो बताएकी हुन् । 

नेपाललाई पहिलो पटक विश्वकप खेलाएर क्रिकेटबाट सन्न्यास लिने रुबिनाको योजना थियो । सन् २००९ बाट राष्ट्रिय टोलीका लागि खेलिरहेकी रुबिनाको यो सपना तत्कालका लागि पूरा हुन सकेन ।

एकातिर नेपाल ग्लोबल क्वालिफायरमा पुग्न नसकेकोमा रुबिनालाई दुःख छ भने अर्कोतर्फ हालसम्म नेपाली महिला क्रिकेटको नेतृत्व सम्हाल्ने खेलाडी उत्पादन नभएकोमा चिन्ता छ । 

“मैले नेपाललाई विश्वकप खेलाएर क्रिकेटबाट सन्न्यास लिन्छु भनेको थिएँ । एसियाली छनोटमा नेपाली महिला क्रिकेट खेलाडीको प्रदर्शनलाई नियाल्दा मैले अझै केही समय क्रिकेटमा बिताउनुपर्छ भन्ने लाग्यो । अहिलेलाई सन्न्यासलाई यही थाती राखेँ,” रुबिनाले भनिन् । 

रुबिनाले नेपाली महिला क्रिकेटको कप्तानी गर्न थालेको १० वर्ष पुग्न लाग्यो । उनले बीचमा कप्तानी छोड्ने मनसाय नबनाएकी भने होइनन् । तर,  महिला टोलीमा दबाब झेल्न सक्ने खेलाडी उनको नजरमा भएन । 

कहाँ चुक्यो नेपाल ? 

नेपाललाई पहिलो पटक ग्लोबल छनोट खेल्ने मौका थियो । नेपालले यूएई, मलेसिया, कुवेत, भुटान र हंङकंङसँग प्रतिस्पर्धा गर्दा जम्मा तीन खेलमा जित निकाल्न सक्यो । 

छनोट खेलअघि नेपालले सबै टोलीलाई कमजोर आँकेको थियो । तर,  नेपालले कुवेट मलेसिया र भुटानलाई हराउँदै ६ अंक मात्र जोडेर छनोट प्रतियोगिताबाटै बाहिरियो । 

नेपालले ठूला टोलीसँग म्याच एक्सपोजर नपाउनु हारको प्रमुख कारण भएको कप्तान रुबिना बनाउँछिन् । उनले ठूलो प्रतियोगिताका लागि खेलाडीले दबाब झेल्न नसक्ने भएकाले त्यसका ठूलो टिमसँग खेलहरू आवश्यक हुने बताइन् । 
“हामीले ठूलो टिमसँग खेल्दा दबाब झेल्न सक्ने अवस्था छैन् । त्यसका लागि हामी अझै तयार भएका छैनौं । खेलाडीमा आत्मबलको कमी देखियो । त्यसको एकमात्र अर्थ हामी ठूलो प्रतियोगिताका लागि अझै तयार छैनौं,” रुबिनाले भनिन् ।

खेलाडीहरूको मिस फिल्डिङ, क्याच ड्रप हुनु हारको मुख्य कारण भएको बताईन् । ठूलो प्रतियोगिताको दबाब नै मिस फिल्डिङ र क्याच ड्रप हुनु भएको बताइन् ।

“मिस फिल्ड हुनु र क्याच ड्रप हुनु भनेको नै खेलाडीमा दबाब हुनु हो । त्यसले नै बलरले धेरै रन खानु पर्यो,” उनले भनिन् । 

फिट्नेसको अभाव 

क्रिकेट खेलाडीमा मुख्य आवश्यक्ता भनेको नै फिटनेस हो । सोही फिटनेसलाई ध्यानमा राखेर रुबिनाले क्यानसँग एक जना फिट्नेस ट्रेनर माग गरेकी थिइन् । 

तर, क्यानले व्यवस्था गर्न सकेन । फिटनेसमा खेलाडीले आफ्नो तर्फबाट आफूले जानेको जति गरे । त्यसको परिणाम विश्वकपका लागि एसियाली छनोटमा देखियो । 

“क्यानसँग मैले फिटनेस ट्रेनरको माग गरेकी थिएँ । तर, क्यानले व्यवस्था गर्न सकेन । खेलमा खेलाडीको फिटनेसमा पनि कमजोरी देखियो,”  कप्तान रुबिनाले भनिन् । 

कमजोर तयारी 

विश्वकपको एसियाली छनोटको तालिका आएको केही समयपछि मात्र महिला टोलीले तयारी थालेको थियो । नेपालमा महिला/पुरुष टोली दुवैले अन्तर्राष्ट्रिय प्रतियोगिता आउन लागेको केही समयअघि मात्र तयारी गर्दछन् । उनीहरूको तयारीले ठूलो प्रतियोगिताका लागि केही राहत हुँदैन । 

नेपाली टोलीसँग प्रतिस्पर्धा गर्ने टोलीहरूले गरेको लामो समयको तयारीले कमजोर बनाइदिन्छ ।“हामीले लामो समय तयारी गर्न पाएनौं । एक महिनाको तयारीले नै खेल्न गएका थियौं । क्यानले नै खेल तालिकाका सार्वजनिक भएको केही दिनमा नै तयारी सुरु गरेको थियो । प्रतियोगिताअघि नै तयारी गर्ने परिपाटिले पनि हामीलाई कमजोर बनाएको हो,” रुबिनाले भनिन् । 

''सन्न्यासको विषयमा सोचेको छैन''

नेपाली महिला क्रिकेटमा नयाँ पुस्ताको कमी छ । केही आएका नयाँ अनुहारको पनि राम्रो भविष्य देखिन्छ । कविता कुँवर, डोली भट्ट, अप्सिरी बेगमलगायत पछिल्लो पुस्ताका खेलाडी हुन् । 

१० वर्ष लामो समय नेपाली महिला क्रिकेटमा बिताएका खेलाडीहरू हाल पनि क्रिकेट टोलीमा उत्कृष्ट खेलाडीको रुपमा छन् । रुबिना श्रेत्रीलगायत, ज्योती पाण्डे,  सीता राना मगर र काजल श्रेष्ठ नेपाली क्रिकेट टोलीमा रहेको लामो समय भयो । 

एसियाली छनोटमा पनि पुराना खेलाडीको प्रदर्शन नै हेर्न लायक भयो । त्यसैले रुबिना र सीताले सन्न्यास लिने कुरालाई थाती राखे ।

“हामी लामो समय क्रिकेटमा लागेको नै नयाँ पुस्तालाई स्थापित गर्ने हो । तर, अझै पनि हामी नै उत्कृष्ट छौं । नयाँ पुस्ता स्थापित नगरी सन्न्यास लिने सोच भयो भने क्रिकेट विकासका लागि हालसम्म गरेको मेहेनत खेर जान्छ,” रुबिनाले भनिन् ।